Navro‘z mamlakatimizda yashayotgan barcha millat va elat vakillarining sevimli bayramiga aylangan. Bayram kunlarida “Saxovat” va “Muruvvat” uylarida yashayotgan shaxslarning holidan xabar olinib, bayram tadbirlari o‘tkazib kelinmoqda.

Sirdaryo viloyatining Sirdaryo tumanidagi “Muruvvat” ayollar internat uyida “Olam nurga to‘lsin sen bilan, Navro‘z!” shiori ostida bayram tadbiri tashkil etildi.

Tadbirda Sirdaryo viloyati bojxona boshqarmasi xodimlari ham qatnashib, “Muruvvat” uyi tarbiyalanuvchilarini Navro‘zi olam bilan tabriklashdi.

–Boshqarmamiz xodimlarining "Muruvvat" ayollar uyiga tez-tez kelib, ularning holidan xabar olib turishi an’anaga aylanib qolgan,– deydi bojxona boshqarmasi mas’ul xodimi Akmal G‘aniyev. –Ayniqsa, ulug‘ ayyom kunlari, bayramlarda sovg‘a-salomlarimiz bilan ularga ko‘tarinki kayfiyat ulashamiz.  

Bayramda internat uyida istiqomat qilayotgan ayollar tomonidan tayyorlangan sahna ko‘rinishlari va konsert dasturlari muassasada davolanayotgan ayollarning mehrga tashna qalblariga yanada xursandchilik ulashdi.

Sh.Suyarov, O‘zA muxbiri