Yangi yil bayrami bolajonlarga bir olam zavqu shavq ulashmoqda. Ayniqsa, sovg‘a olishning gashti bo‘lakcha. Farg‘ona viloyati hokimi Xayrullo Bozorov Farg‘ona shahridagi “Muruvvat” nogironligi bo‘lgan bolalar uchun internat uyida bo‘lib, bu yerda 253 nafar o‘g‘il-qizlarga Prezidentimizning Yangi yil sovg‘alari topshirildi.

Bugungi kunda “Muruvvat” bolalar internat uyida 147 nafar o‘g‘il va 106 qiz bolalar tarbiyalanmoqda. Ularning 138 nafari mustaqil yurish imkoniyatiga ega bo‘lsa, qolgan qismi o‘ta katta e’tiborga muhtoj yotoq va emaklovchi bolalardir.

“Muruvvat” bolalar internat uyi tibbiy-ijtimoiy muassasa hisoblangani uchun tibbiy xodimlar va pedagoglar hamkorlikda faoliyat yuritadi. Muassasada jami 275 nafar shifokor, hamshira, tarbiyachi, psixolog, logoped, enaga va boshqa xodimlar faoliyat olib boradi.

M.Sulaymonov, O‘zA