Ўзбекистон Республикаси Президенти Шавкат Мирзиёевнинг тадбиркорлар билан очиқ мулоқоти давом этмоқда. Тадбирда “Franchising invest” МЧЖ раҳбари Мурод Назаров ҳам сўзга чиқди:

–   Тўрт йил олдин “Tashkent sity” қурилиши бошланганда давлатимиз раҳбарига ушбу ҳудудда осмонўпар бино барпо этиш таклифини билдирган эдим. Шунда Президентимиз: “Чет эллик инвестор бундай бинони қуриши мумкин, лекин ўзимизнинг қоракўз қурса мен икки карра хурсанд бўламан. Қургин, биз қўллаб-қувватлаймиз”, деганди. Ўшанда жуда ҳам руҳраниб, ишни бошлагандик. Ҳозирги кунда 266 метрлик бино қурилишини якунлаяпмиз. Насиб этса Мустақиллик куни охирги қавати битади, ўша куни осмонўпар бинода Ўзбекистон мадҳиясини оркестрда чалдиришни ният қилганмиз. Бу ҳам байрамда халқимизга ўзига хос туҳфа бўлади.

Биз МДҲдаги энг йирик ва инновацион “Био групп” компанияси билан қўшма корхона ташкил қилдик. Биринчи йилнинг ўзида 100 миллион долларлик пул айланмасига эришдик. Халқимизда “Болангга ишонгин, у ўниб-ўсади”, деган гап бор. Президентимизнинг ишончи менга жуда катта куч бўлди, тўрт йилда кўп натижаларга эришдим.

Бугунги учрашувдан тадбиркорлар жуда ҳам руҳланди, Учинчи Ренессансга Президентимиз бошчилигида яна битта ғишт қўйилди. Бундай эътибор туфайли янги-янги тадбиркорлар пайдо бўлади, бу эса мамлакатимиз иқтисодиёти янада ривожланишига туртки бўлади.

Абдулазиз Мусаев ёзиб олди,

ЎзА