Mundo газетасининг ёзишича, Мадридда яшовчи 84 ёшга кирган қария рашк туфайли кампирини ўлдириб қўйган. Қотил ўзининг мудҳиш ишини болға билан амалга оширгани айтилмоқда.

Чоршанба куни тунда Мадрид шаҳрининг Мораталас мавзесига полициячилар шошилинч чақирув бўйича етиб келган. Қотиллик рўй берган уйнинг қўшниларидан бири аёл кишининг ёрдам сўраб қичқирганини айтган.

Полициячилар уй остонасига келганида гумонланувчининг ўзи уларга эшикни очган ва жиноятини тан олган. Жароҳат олган кампир зудлик билан касалхонага олиб борилган, кейинроқ у ҳаётдан кўз юмган. Марҳума 81 ёшда экани айтилмоқда.

«У туманнинг ҳамма эркаклари билан юради. Мен афсус чекмайман, у шунга муносиб эди, баттар бўлсин», - деди марҳуманинг эри полициячиларга.

Чол-кампирнинг никоҳдан ўтганига 40 йил тўлган. Қўшниларнинг гувоҳлик беришича, уларнинг уйида ҳар доим жанжал бўлиб турган. Жанжалга асосан эркак сабабчи бўлган, чунки у жуда рашкчи бўлиб, кампирини ҳар доим назоратда ушлаб туришга ҳаракат қилган.