Бугун, 3 июль куни Сурхондарё вилоятининг Термиз шаҳри, Ангор тумани ва бошқа яқин ҳудудларда кучли чанг бўрони кузатилмоқда. Маълумотларга кўра, чанг бўрони оқибатида ҳаво анча ифлосланган. Аниқроқ айтадиган бўлсак, ҳаводаги чанг нормадагидан 15 маротаба кўпни ташкил этмоқда. Бу эса йўлларда ҳаракатланиш ва бошқа кўпгина ноқулайликларни келтириб чиқаради. Табиат ҳодисаларга бой. Масалан, мутахассислар июль ойида Ерни бир нечта магнит бўронлари қоплаши мумкинлигини билдиришмоқда. Уларнинг айтишича, июл ойи бошида кузатиладиган магнит бўрони нисбатан кучсиз бўлади, бироқ 8 июлга келиб у фаоллашади.

Ўзбекистон 2023 йилнинг январь-май ойларида 3811 та электромобиль импорт қилган. Унга кўра, электромобиль импорти ўтган йилнинг мос даври билан солиштирилганда 2846 тага ёки қарийб 4 баробарга ошган. 2023 йилнинг январь-май ойларида энг кўп электромобиль Хитойдан импорт қилинган. Ундан кейинги ўринларда Гонконг ҳамда Германия турибди. Шунингдек, БААдан 16 та, Кореядан 11 та ва АҚШдан 6 та электромобиль келтирилган. Дастлабки уч ойда мамлакатга хориждан қиймати 54,7 млн долларга тенг бўлган 1668 дона электромобиль импорт қилинганди.

<iframe width="650" height="420" src="https://www.youtube.com/embed/fcyi5AIQ0lo" title="Муҳим мавзу: Сурхондарёда кучли чанг бўрони кузатилмоқда" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" allowfullscreen></iframe>

Қозоғистоннинг Қўстанай вилоятидаги жанубий икки туманда жойлашган далаларга чигирткалар ҳужум қилгани айтилмоқда. Катта ҳажмдаги ҳашаротлар тўдаси даладаги ўсимликларни тўлиқ зарарлаган. Бу ҳақда “Tengrinews.kz” нашри хабар берди. Қозоғистоннинг Қишлоқ хўжалиги вазирлиги берган маълумотларга кўра, жорий йил ҳосил етиштиришда анча катта муаммоларга дуч келинмоқда. “Бу йил ҳосил етиштиришда қийин аҳволда қолдик. Бунга биринчи сабаб 10 минг гектарга яқин ерни оёқ ости қилган кийиклар муаммоси бўлса, ҳозир эса чигирткалар. Бу йил 10500 гектар майдонга экилган ҳосилни чигирткалар еб юборди”, дейди вазирлик вакили. Бундай ҳодисалар табиатда кузатилиб туради. Лекин, ҳашоратларнинг бундай ҳужумига нима сабаб бўлиши ҳақида аниқ бир сабаблар ҳозиргача аниқланмаган.

Францияда полициячи томонидан отиб ўлдирилган 17 ёшли йигитнинг бувиси невараси ўлимидан кейин мамлакатда бошланган тартибсизликларни тўхтатишга чақирди. Бу ҳақда у BFM телеканалига берган интервьюсида айтиб ўтди. “Мен буни ҳамма жойда тўхтатишни хоҳлайман. Биз ҳамма нарсани тинчлантиришни хоҳлаймиз. Мактабларни вайрон қилманг, автобусларни бузманг”, дейди марҳумнинг бувиси. У чарчаганини ва ҳаммаси тугаганини, неварасини қайтариб бўлмаслигини қўшимча қилган. Шунингдек, у набирасини отган полициячи адолатли жазоланишига ишонч билдирган. Бундан ташқари, буви намойишчиларни қилмишлари учун жавобгарликка тортиш тарафдори эканини таъкидлаган.  

Сиз куннинг муҳим мавзулари билан танишдингиз. Бизни ижтимоий тармоқдаги саҳифаларимиз орқали кузатиб боринг.

Фаррух Худоёров, Кенжа Бекжонов, Аброр Содиқов, Искандар Исматов (видео), ЎзА