Bugun mamlakatimizda muhtaram ustozlarimiz, aziz murabbiylarimizning kasb bayramlari keng nishonlanmoqda. Eng sharafli va saodatli vazifaning fidoiy egalari bo‘lgan bu olijanob insonlar yonimizda ekan, har kunimiz shodiyona, tantanaga aylanajak.

Ustozlarimizning mamlakat suyanchi va tayanchi bo‘lgan yosh avlod qalbiga ilm-fan, ma’naviyat ziyosini ulashish, millatni ma’rifatli qilishday ulug‘vor va buyuk mehnatlari oldida hamisha ta’zimdamiz. Ushbu ezgulik yo‘lida ular bilan yelkadosh ekanimdan, ustozlik kasbini tanlaganimdan faxrlanaman. Ustoz ta’rifi borasida so‘z mulkining sultoni Alisher Navoiy hazratlari -

Agar shogird shayxulislom, agar qozidur, Agar ustoz rozi – Tangri rozidur deya tarixiy satrlarni keltirganlari ham bejiz emas. Zero, bugun ularning zahmatlari, bergan ta’limi, yetaklagan tarbiya yo‘li bizga, farzandlarimizga hayotni o‘rgatdi, muvaffaqiyatlar eshigini ko‘rsatdi.

Prezidentimizning O‘zbekiston o‘qituvchi va murabbiylariga yo‘llagan bayram tabrigi barchamizni behad mamnun etdi. Unda ta’kidlaganidek, muallimning obro‘-e’tibori – bu avvalo millatning, butun xalqning obro‘-e’tiboridir. Shu bois, biz keyingi yillarda o‘qituvchi va murabbiylarning jamiyatimiz hayotidagi o‘rni va ta’sirini kuchaytirish, ta’lim tizimini zamon talablari asosida tashkil etish bo‘yicha ulkan islohotlarni amalga oshirmoqdamiz. Xususan, oliy ta’lim tizimidagi yangilanishlar ham ta’lim sifatini oshirishga, pirovard maqsad esa Vatan va xalq manfaati uchun mardona kurashadigan, o‘zining qat’iy hayotiy pozitsiyasiga ega, hech kimdan kam bo‘lmagan yoshlarni tarbiyalashga xizmat qilmoqda.

1 oktyabr – O‘qituvchi va murabbiylar kuni mehridaryo ziyokorlarning, ma’rifat ulashuvchilarning shodiyonasidir. Yangi O‘zbekistonning g‘ururi, faxri, qudrati siz ta’lim berayotgan yoshlar qo‘lida ekan, zimmangizdagi mamlakatning eng mas’uliyatli vazifasini ado etishda kuch-quvvat tilayman.

Bahodirjon Shermuhammedov,

Farg‘ona davlat universiteti rektori