МУНОСАБАТ: ҳар бир кун байрам
Бу воқеа улкан ўзгаришларга асос бўладиган ва бугунги долғали даврда кўз кўникиб, онг ўрганиб улгурган ўнлаб фармони олийлар қаторида эл-улус томонидан хотиржам қабул қилинди.
Кеча, 10 апрель куни муҳтарам Президентимиз Ўзбек тили куни байрамини белгилаш тўғрисидаги Қонунни тасдиқлаб, имзо чекди. Бу воқеа улкан ўзгаришларга асос бўладиган ва бугунги долғали даврда кўз кўникиб, онг ўрганиб улгурган ўнлаб фармони олийлар қаторида эл-улус томонидан хотиржам қабул қилинди.
Аслида-чи? Тилимизга тож кийдирилиши бизнинг асрий орзуйимиз, оталарнинг қўлетмас армони эмасмиди?
Миллатдошлари жам бўлган мажлисда ўз тилида сўзлашдан маҳрум бўлган, она тили мавзусидаги илмий ишини асл тилида ҳимоя қилишга ҳуқуқсиз зиёли-олимларнинг аччиқ изтиробига айланмаганмиди бу ўксиз тил?
Ўзбек тили деганда не-не алломаи замонлар тилига тушов тушиб, дудуқланиб қолмасмиди?
Бу қутлуғ имзо чекилган лаҳза жувонмарг Абдулла Қодирийнинг туғилган кунига тўғри келганичи!?
Қайси бир қаттол кимсанинг ювуқсиз бармоғи-ла чекилган қўл буюк сўз санъаткорини, миллат фидойисини нобуд этган бўлса, бу олийният имзо муаллақ қазо топган барча устоду улуғларимизга қайта жон бахш этди.
Ўтган йили кузакда бу Қонуннинг пойдевори қўйилгани, махсус Фармон билан бизнинг кўнгилларни хижил қилган барча тугунлар ечилгани эсингизда бор, албатта. Вазирлар Маҳкамасида Тил департаменти тузилиши, ўн йилларга мўлжалланган тилни ривожлантириш дастури ва бошқа ўнлаб масалаларни қамраб олган бу ҳужжат аллақачон амалиётда ишга тушган. Вазирликлар, ташкилотларда Тил сиёсати билан шуғулланадиган муовин ўрни ташкил этилгани эса бу борада давлат ва ҳукуматнинг аҳди қатъийлигидан дарак бериб турибди.
Аммо...ура, деб дўппини осмонга отишга ҳали пича эрта. Ўҳ-ҳў, олдинда қанча юмуш-вазифалар бизни кутиб турибди. Аввало, ўзимиз она тилимизнинг ҳурматини ўринлатишни ўрганишимиз керак! Тил маданиятини эгаллашимиз, бобосўзни чангу ғуборлардан асрашимиз зарур. Болаларимизга тилимиз чиройини уқтиришимиз, бу қадим туркий тилнинг бошбулоғи эканини тушунтира олишимиз шарт! Ва ниҳоят, илму амални бир қилиб, компьютер-интернетни ўзбекча гапиртиришимиз тақозо қилинади.
Қийинми? Ҳа, қийин. Аммо Навоий Ҳиротда туғ кўтарган даврча қийинмас.
Оғирми? Ҳа, оғир. Лекин Қошғарий ’’Сумлим дастидан дод‘‘ деган ўдлакча эмас. Мушкулми? Ҳа, мушкул. Бироқ, миллий тил деса, миллатчи тамғаси босиладиган, тил деганда тилга эрк берма, деган қизил ва ола замонча эмасдир..
Бизда бугун миллий давлат бор! Миллатим, Ватаним, деб ҳайқирадиган раҳбар бор!
Тилга таянч бўлгувчи Фармон, Қонун бор!
Биз ҳаммамиз бир бўлиб мазкур ҳужжатларни ҳаётимизга олиб киришимиз, тарғиб қилишимиз, курашишимиз керак!
Ана шунда... боболар биздан рози бўлади. Шундагина болалар олдида юзимиз шувит бўлмайди.
Бу бир кунда бўладиган иш эмас, йиллар, ўн йиллар керак бўлар эҳтимол. Бугун гапимиз гап: ушбу қонуний имконни қўлдан чиқармаймиз!
Бир пайтлар ғаламислар ўзбек тилига кун беришмади.
Энди ҳар кун мўътабар Она тилимиз кунидир!
Байрам қутли бўлсин, қондошларим!
Иқбол Мирзо