Мәскеу қаласында туризм саласындағы ынтымақтастық бойынша Ресей-Өзбекстан кіші комитетінің бірінші отырысы өтті.

Өзбекстан Туризм комитетінің бірінші орынбасары Джамшид Абдусаломов пен Ресей экономикалық даму министрінің орынбасары Дмитрий Вахруков жүргізген кездесудегі сұхбат барысында екіжақты күн тәртібіндегі өзекті мәселелер, атап айтқанда, бұрын қабылданған шешімдер мен құжаттарды жүзеге асыру барысы, Өзбекстан мен Ресей арасындағы туристер ағынын арттыру үшін жағдай жасау жөніндегі үкіметаралық іс-қимыл жоспары мен екі ел арасындағы 2025-2026 жылдарға арналған ынтымақтастық бағдарламасы талқыланды.

Сондай-ақ, Ташкент арқылы Ресей қалаларынан басқа елдерге рейстерді ұйымдастыру және 2024-2025 жылдары Ресейде «Өзбекстанның туризм жылын» өткізу мәселелері қарастырылды.

«2024 жылдың бірінші тоқсанында Өзбекстан мен Ресей арасындағы туристік ағынның көрсеткіші 2023 жылмен салыстырғанда 20 пайыздан астамға өсті», - деп атап өтті РФ Экономикалық даму министрінің орынбасары Дмитрий Вахруков.

Кездесу соңында Өзбекстан-Ресей туризм саласындағы ынтымақтастық жөніндегі кіші комитет отырысының хаттамасына қол қойылды.