Бугун эрталабдан юртимизнинг барча ҳудудида парламент ва маҳаллий Кенгаш депутатлари сайлови фаоллик билан бошлаб юборилди. 11 минг 28 та сайлов участкасида фуқаролар ўз фуқаролик бурчини амалга оширмоқда.

Қайд этиш лозимки, бу йил сайловчиларнинг электрон рўйхатига мамлакатимиздаги 19 миллион 944 минг 859 нафар сайловчи киритилган. Бундан ташқари, чет эллардаги сайловчиларимиз 165 минг 631 нафарни ташкил этмоқда.

Бу галги сайловларда Қонунчилик палатасига жами 875 нафар, Қорақалпоғистон Республикаси Жўқорғи Кенгеси, Халқ депутатлари вилоят ва Тошкент шаҳар кенгашларига жами 3 минг 625 нафар, халқ депутатлари туман ва шаҳар кенгашларига жами 24 минг 850 нафар номзод кўрсатилди.

“Менинг танловим – обод Ватаним!” шиори остида ўтаётган сайловларда мамлакатимизда фаолият юритаётган бешта сиёсий партия ва улар томонидан кўрсатилган номзодлар рақобатга киришган.

Марказий сайлов комиссиясининг Матбуот марказида ҳам иш жараёнлари қизғин. Бу ерда маҳаллий ва хорижий оммавий ахборот воситалари вакиллари учун барча шарт-шароитлар яратилган: компьютерлар билан таъминланган, Интернет тармоғи ишлаб турибди. Марказий сайлов комиссияси раиси ҳамда вазирлик ва идоралар вакиллари иштирокида брифинглар ташкил этилиб, сайлов жараёнларининг бориши тўғрисида батафсил маълумотлар тақдим этиб борилмоқда.

<iframe width="640" height="420" src="https://www.youtube.com/embed/N08IsSUCGwc" title="MSK Matbuot markazida ish qizgʻin" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Азиз юртдошлар, овоз беришда иштирок этинг ва сайлов жараёнларига оид янгилик ва маълумотларни ЎзАда кузатишда давом этинг!

Муҳтарама Комилова,

Ёқуб Мелибоев (сурат, видео), ЎзА