Ўтган асрнинг глобал муаммосига айланган Орол фожеаси ва у ерда яшаётган минглаб юртдошларимизнинг бошига тушган мусибат нафақат бир минтақанинг, балки дунёнинг оғриқли нуқтасига айланди. Бу масалага доимо кенг жамоатчилик эътибори қаратиб келинган ва кўплаб гапирилган. Лекин, ушбу муаммоларни профессионал ижодкорлар тасвирларида акс этиши доимо эътиборли воқеадир.

Тошкент фотосуратлар уйида ташкил этилган: “Мўйноқ: кеча, бугун, эртага” деб номланган кўргазмада намойиш этилган фотосуратларда аввало ўтмишда Оролнинг лиммо-лим эканлиги, унда болалар мириқиб чўмилаётгани, балиқ ови хуллас аҳолининг қувноқ чеҳралари ва фаровонликни акс эттирувчи Равил Албековнинг оқ-қора суратлари ўрин олди. Бироқ кейинги ўринларда инсоният фаолияти туфайли Оролнинг қуриши, шўр босган ҳудудларда бир муддат тараққиёт тўхтаб қолиши барчани чуқур мулоҳазага чорлайди. Кўргазманинг кульминацион нуқтаси: кейинчалик инсон қўли билан саҳро ўрнида ўрмонлар барпо этилиши, флора ва фаунанинг қайта тирилиши моҳирлик билан суратларда муҳрланган. 

<iframe width="650" height="420" src="https://www.youtube.com/embed/NVyzHGKgtMU" title="Moʻynoq: kecha, bugun, ertaga" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Яна бир эътиборли жиҳати, кўргазмада асосий урғу бугунги Мўйноқнинг қайноқ ҳаётига берилганлигидадир. Ёшларнинг қизиқишлари, қурилиш ва бунёдкорликлар, ўлкага қайта ҳаёт бағишлаган иморатлар сизни бефарқ қолдирмайди. 

Шўр босган ҳудудларда олинган профессионал фотосуратларнинг муаллифлари Виктор Ан ва Ҳамдам Шораҳмедовларнинг Орол фожеасини кўрсатувчи бадиий фотосуратлари ҳамда Ўзбекистон Миллий Ахборот агентлиги фотомухбирларининг ижод намуналари кўргазмага келганларни бефарқ қолдирмади. 

Бир сўз билан айтганда мазкур намойишда мавзулар кўп ва ҳар бир фотосурат чуқур маънога эга. Тақдимот маросимида ташкилотчилар: Ўзбекистон Бадиий академияси ва Миллий Ахборот агентлиги вакиллари кўргазманинг мазмун-моҳияти ҳақида тўхталиб ўтдилар ҳамда кенг жамоатчиликни Орол муаммосига бефарқ бўлмасликка чақирдилар. Кўргазма 23 августгача давом этади. 

Санжар Тошпўлатов, Дониёр Якубов, Улуғбек Тўхтаев, ЎзА