Россия ҳарбий разведкаси генерали Владимир Алексеевга уюштирилган отишма ортидан халқаро даражадаги тергов иши очилди.

Мамлакат Федерал хавфсизлик хизмати маълум қилишича, Москвада содир бўлган ҳужумда гумон қилинаётган шахс Дубайда қўлга олиниб, Кремлга топширилган. 

Манбага кўра, рус фуқароси Любомир Корба ҳужумни амалга оширганликда гумон қилинмоқда. Тергов давомида яна икки нафар шерик аниқланган: улардан бири Москвада ушланган, иккинчиси эса Украинага қочиб кетгани айтилмоқда. Расмийлар воқеани олдиндан режалаштирилган суиқасд сифатида баҳолаяпти.

Ҳодиса жума куни Москванинг шимоли-ғарбий қисмида содир бўлган. Номаълум шахс турар жой биноси олдида Алексеевга бир неча бор ўқ узган. Оғир тан жароҳати олган генерал касалхонага ётқизилган ва шифокорлар назоратида қолмоқда.

РФ ташқи ишлар вазири Сергей Лавров ҳужум учун Украинани масъул деб атаб, буни “террорчилик ҳаракати” дея баҳолади. Унинг айтишича, мақсад — Россия, Украина ва АҚШ ўртасида Абу-Дабида бўлиб ўтган тинчлик музокараларидан кейинги жараённи издан чиқариш.

Мусулмон Зиё, ЎзА