Белоруссия президенти Александр Лукашенко Минск билан Москва қиймати бир миллиард долларлик қурол-яроғ етказиб бериш бўйича келишувга эришгани ҳақида маълум қилди.

"Мен Россия раҳбарияти, ҳарбийлари ва ҳарбий саноат комплексидан миннатдорман. Улар 2025 йилгача бизга етказиб берадиган қурол-яроғларнинг  катта рўйхатини тақдим этишди. Булар, тахмина 10 тача самолёт, бир неча ўн дона  вертолёт, ТОР-М2 мажмуаларидан иборат. Бу бизнинг ва Россия Федерациясининг ғарбий йўналишни жуда жиддий қабул қилишимиздан далолат беради, чунки ғарбий йўналишда НАТО қўшинлари билан ёнма-ён трибмиз", — деди Белоруссия раҳбари.

Лукашенко шунингдек, Владимир Путин билан бўлиб ўтган музокараларда замонавий С-500 зенитли ракета тизими ҳақида гап борганлигини маълум қилди.

 Унинг таъкидлашича, икки мамлакат армияси Иттифоқдош давлатнинг хавфсизлигини таъминлашга тайёр.

10 сентябрдан 16 сентябргача Россиянинг тўққизта ва Белоруссиянинг бешта ҳарбий дала майдонида "Ғарб-2021" стратегик ўқув-машқлари бўлиб ўтади.