Молдова Президенти Майя Сандуда янги турдаги коронавирус (COVID-19) аниқланган. Бу ҳақда давлат раҳбари душанба куни ижтимоий тармоқ орқали йўллаган видео мурожаатида маълум қилди.

Маҳаллий ОАВ ёзишича, мамлакат етакчиси Мустақиллик кунига бағишланган тадбирларда қатнаша олмаслигидан афсусда эканини билдирган:

– Азиз дўстлар, фуқаролар! Афсуски, менга COVID ташхиси қўйилди. Бугун ва эртага оммавий тадбирларда қатнаша олмайман. Ўзимни яхши ҳис қиляпман, одатдагидан фарқли бироз чарчоқдан бошқа ҳеч қандай аломат йўқ. Хатар юзага келтирмаслик учун бир неча кун холи қоламан.

Давлат раҳбари ватандошларига “COVID йўқолмагани”ни эслатиб, инфекциядан шубҳаланганларни таҳлилдан ўтиш, шифокорга мурожаат қилишга чақирди.

Бугун Молдова Республикасида Мустақиллик кунига бағишланган барча тадбирлар белгиланган дастурга мувофиқ ўтади.

Пойтахт ҳокимлиги Соғлиқни сақлаш бошқармаси маълум қилишича, сўнгги бир ҳафта ичида COVID-19 билан касалланганлар сони 40 фоиздан кўпроқ ошган. 87 киши Кишинёв шифохоналарига жойлаштирилган. Улардан етти нафарининг аҳволи оғир.