2025 йилнинг биринчи ярмида Ўзбекистондан етиштирилган мева-сабзавот маҳсулотларининг экспорти географияси кенгайиб, бу борада дунёнинг 80 га яқин давлатлари билан савдо алоқалари кенг ривожланди.
Бу йил серқуёш заминимизда етиштирилган мева-сабзавотлар, қуруқ мевалар илк бор Марокаш, Иордания, Сербия, Австралия, Гватемала, Колумбия, Эквадор, Швеция каби давлатларга етиб борди.
Мева-сабзавотларни экспорт қилувчи тадбиркорлар сонининг жорий йилда 6 фоизга кўпайиб, 1200 нафарга яқинлашгани ҳам соҳада катта ютуқ сифатида қабул қилиш керак.
Давлатимиз раҳбарининг жорий йил 24-25 июнь кунлари Мўғулистонга қилган олий даражадаги расмий ташрифлари давомида қишлоқ хўжалиги ва озиқ-овқат соҳаларида бир қатор келишувларга эришилган эди. Шундан дастлабки маҳсулот сифатида Мўғулистондан минг бош “Баяд” зотли қўйларни Навоий вилоятида кўпайтириш учун Ўзбекистонга олиб келинган бўлса, куни кеча юртимизнинг сархил мева ва полизлари ушбу давлатга жўнатилди.
Жумладан, Ўсимликлар карантини ва ҳимояси агентлиги бош директори Иброҳим Эргашев Навоий халқаро аэропортида Мўғулистон давлатига экспортга тайёрланган қишлоқ хўжалиги маҳсулотларининг фитосанитар ҳолати, қадоқланиши ва маркировкалаш жараёнларини кўздан кечирди.
Дастлабки жўнатмада 6 тонна 4 хил навли узум, 2 тонна “Торпедо” навли қовун мавжуд. Бу маҳсулотлар Ўзбекистон ҳудудларида етиштирилган бўлиб, барча халқаро талаб ва стандартларга мувофиқ тарзда қадоқланган.
Маълумот учун айтиш керакки, Мўғулистонга илк бор бундай ҳажмдаги узум ва қовун ҳаво транспорти орқали экспорт қилинмоқда. Бу эса Ўзбекистон қишлоқ хўжалиги маҳсулотлари учун янги бозорларнинг очилаётганидан далолат беради.
<iframe width="640" height="420" src="https://www.youtube.com/embed/T836NcWLpBI" title="Mo‘g‘ulistonga qishloq xo‘jaligi mahsulotlari eksporti boshlandi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>Санжар Тошпўлатов, Улуғбек Тўхтаев (видео), ЎзА