Моңғолияда 9 маусымда президент сайлауы өтіп жатыр. Бұл сайлау елдің конституциясы президенттік мерзімге өзгерістер енгізілгеннен кейінгі алғашқысы. Ендігі сайланған презиент 6 жыл мерзімге қызмет етеді.

Бұған дейін ел президенті 4 жылға сайланған және тағы бір мерзімге қайта сайлануы мүмкін болған. Өзгерістерге сәйкес, Моңғолия Президенті енді 6 жылдық мерзімге көшті. Сондықтан 2017 жылы ел президенті болып сайланған Халтмаагийн Баттулга қазіргі сайлауға қатыса алмады.

Сайлау жергілікті уақытпен таңғы 7-де басталды және 22.00-ге дейін жалғасады. Оған 2,15 миллионнан астам азамат қатыса алады. Президенттікке үш үміткер таласуда: бұрынғы премьер-министр және билеуші ​​Моңғолия Халықтық партиясының төрағасы Ухнаагин Хүрелсух, оппозициялық Демократиялық партияның бұрынғы төрағасы Содномзундуйн Эрдене және парламенттің бұрынғы мүшесі, «Оң дауыс берушілер» коалициясының мүшесі Дангаасуренгийн Энхбат.

Сарапшылар Моңғолия Халықтық партиясының төрағасы Ухнаагийн Хурелсухты президенттік сайлауда фаворит деп санауда. Өйткені оның партиясы 2020 жылғы маусымдағы парламенттік сайлауда жеңіске жетіп, парламенттегі 76 орынның 62-сін иелеген.

Сайлауда 50 пайыздан астам дауыс алған үміткер жеңімпаз деп танылады. Егер үміткерлердің ешқайсысы мұндай нәтижеге қол жеткізбесе, онда екінші тур ең көп дауыс алған екі үміткердің қатысуымен өтеді.