Францияның «Montagne et Neige Développement France» компаниясы Өзбекстанда халықаралық демалыс орнын салады.

Өзбекстан-Франция сауда-экономикалық ынтымақтастық жөніндегі үкіметаралық комиссияның 9-шы отырысы аясында «Белдерсай-Чимган-Нанай» халықаралық маусымдық демалыс орнын салу және пайдалану жөніндегі жобалық кеңсе мен француздық «Montagne et Neige Développement» компаниясы арасында келісімшартқа қол қойылды.

Жобаның жүзеге асырылуы нәтижесінде Өзбекстан тұрғындарына да, шетелдік қонақтарға да ашық ауада демалудың көптеген түрлерін ұсынатын халықаралық деңгейдегі кешен пайда болады. Жоба аясында демалушыларды 2515 метр биіктікке жеткізетін 10 адамдық аралық арқан жолы және 3309 метрге көтерілетін 80 адамдық негізгі арқан жолы салынады. Соның арқасында атаулы демалыс орны Орталық Азиядағы мұндай нысаны бар ең биік нүктеге айналады. 

Сондай-ақ кешенде «XXL Zip line», «Alpine coaster», «Adventure Tower», «Tubing», «Via ferrata» сияқты қысқы және жазғы аттракциондардың 20-дан астам түрі ұйымдастырылады. Ұзындығы 20 шақырымнан асатын 11 түрлі шаңғы алаңы, 6 мың орындық қонақүй мен коттедж салынады. 

Бұл ірі бастама халықаралық маусымдық демалыс орны, туристік бағыт, ойын-сауық орындары және арқан жолы бар жаңа туристік кешен құруды көздейді. Сонымен бірге облыстың инвестициялық тартымдылығын арттыру, Ташкент облысының туристік инфрақұрылымын дамыту, республиканың таулы аймақтарында бұқаралық спортты насихаттауға жағдай жасау көзделген.

Осы демалыс орны аяқталып пайдалануға берілгенде, жылына 3,1 млн адамға қызмет көрсететін халықаралық маусымдық демалыс орнын құру нәтижесінде 451 жаңа жұмыс орны ашылады.