Фоторепортаж

Пойтахтимиздаги Миллий матбуот марказида Ўзбекистон крикет федерацияси раиси Азиз Михлиев, Халқаро крикет кенгашининг  Осиё мамлакатларида крикетни ривожлантириш бўлими бошлиғи, олий тоифали халқаро эксперт, жаноб Иқбол Сикандер ҳамда шу ташкилот менежери Нитеша Котарий билан оммавий ахборот воситалари ходимлари ўртасида қисқа мулоқот бўлиб ўтди.

Оммавийлиги жиҳатидан футболдан кейин иккинчи ўринда турувчи ва бугунги кунга келиб жаҳоннинг 4 миллиарддан ортиқ аҳолисининг севимли спорт турига айланган крикет мамлакатимизда ҳам оммалашиб бормоқда. Айни кунгача  крикет бўйича 15 та жамоа фаолият олиб бормоқда. Шунингдек,  турли соҳаларда меҳнат қилаётган чет эллик мутахассислардан иборат бўлган 2 та жамоа ҳам шаклланиб бўлган.

[gallery-7897]

Мамлакатимизда меҳмон бўлиб турган соҳа мутахаcсисларидан иборат гуруҳ аъзолари Ўзбекистонда крикет спорт турининг ривожланиш имкониятлари, омма ўртасида бу спортга бўлган қизиқишни ўрганишмоқда. Сафар таассуротлари ҳамда крикетнинг мамлакатимизда ривожланиш жараёнлари ҳақидаги хулосалар халқаро кенгаш раҳбариятига тақдим этилгач, Ўзбекистон крикет федерациясининг халқаро ва Осиё крикет кенгаши аъзолигига қабул қилиниш масаласи кўриб чиқилади.

Муҳаммад АМИН (сурат),ЎзА