Грузияда биліктегі «Грузин арманы» партиясының атынан ұсынылған Михаил Кавелашвили алтыншы президент болып сайланды.

Бұл туралы Орталық сайлау комиссиясы хабарлады.

Президенттікке жалғыз үміткер болған Кавелашвилиге 224 таңдаушы дауыс берді. Жеңіске жету үшін толық құрамның үштен екісін, яғни 200 дауысты жинау жеткілікті болды.

Грузия тарихында алғаш рет президент тікелей азаматтардың дауысымен емес, таңдаушылар алқасы арқылы сайланды. 

Михаил Кавелашвили – бұрынғы футболшы, қазіргі саясаткер және парламент депутаты. Ол көбіне батысқа қарсы көзқарастарымен танылған тұлға. Оппозиция сайлауға бойкот жариялап, өз кандидаттарын ұсынудан бас тартты.

Жаңа президенттің өкілеттік мерзімі – бес жыл. Инаугурация салтанаты 29 желтоқсанда өтеді.

Алайда Грузияның бесінші президенті Саломе Зурабишвили бұл сайлауды «пародия» және «арандату» деп бағалап, оны заңсыз деп атады. Ол оппозициямен бірге қазіргі парламентті легитимді емес деп санап, елде жаңа парламент сайлауы өткенге дейін өз өкілеттілігін тапсырудан бас тартатынын мәлімдеген.