Қарши шаҳридаги Корхоналарни соғломлаштириш клиникасида замонавий ишлаб чиқариш мини технологиялари кўргазмаси очилди.

Вилоят ҳокимлиги ва савдо-саноат палатаси вилоят ҳудудий бошқармаси ҳамкорлигида ташкил этган тадбирда 19 та хорижий компаниянинг 200 дан ортиқ мини технологиялари намойиш этилмоқда.  

Кейинги йилларда аҳоли бандлигини таъминлаш, ички бозорни импорт ўрнини босувчи рақобатбардош маҳсулотлар билан тўлдириб боришда кичик бизнеснинг роли ва аҳамияти ошмоқда. Бу жараёнда ишлаб чиқарувчиларни замонавий технологиялар билан таъминлаш, фаолияти учун зарур ускуналарни танлаб, харид қилишида қулай шарт-шароит яратиш устувор вазифа саналади. Ташкил этилган кўргазма эса айни шу мақсадларга хизмат қилиши билан аҳамиятлидир.  

Айтиш жоизки, жорий йилдан бошлаб ҳудудларда “Аёллар дафтари” ва “Ёшлар дафтари”га киритилган кўплаб фуқаролар ҳудудий бандликка кўмаклашиш марказлари ёрдамида талаб юқори бўлган касблар, жумладан, тикувчилик, пишириқлар тайёрлаш, ошпазлик, сартарошлик, мебелсозлик ёки шунга ўхшаш касб-ҳунарларни ўрганмоқда. Мазкур кўргазма ана шундай фуқаролар учун ҳам қўл келди. 

Ўқув курсларини тамомлаб, исталган йўналишда бирор тадбиркорликни йўлга қўймоқчи бўлган киши бемалол бу ерга келиши ва танлаган фаолияти учун керакли ускунани харид қилиш бўйича шартнома имзолаши мумкин. Бундан ташқари, кўргазмада фермер ва ишбилармонлар бугунги кунда ишлаб чиқаришда фойдаланилаётган энг замонавий технологиялар, ускуналар билан танишиши, уларни харид қилиши мумкин.  

[gallery-3356]

Аҳамиятли томони, кўргазмада намойиш этилаётган барча технологиялар бевосита хорижий ишлаб чиқарувчилар ёки уларнинг мамлакатимиздаги ҳамкорлари томонидан тақдим этилмоқда. Бу эса ортиқча оворагарчиликларнинг олди олиниб, алданиб қолиш мумкинлиги ҳақидаги хавотирларга ўрин қолдирмайди

Дарҳақиқат, кўргазма павилонларидан қишлоқ хўжалигида агротехник тадбирларни бажариш, турли таомлар, ширинликларни тайёрлаш, озиқ-овқат маҳсулотларини қадоқлаш, хизмат кўрсатиш, тикув-трикотаж, паррандачилик, чорвачилик ва шу каби турли йўналишларда фойдаланиш мумкин бўлган кўплаб мини-технологиялар ўрин олган. Энг муҳими мини технологиялар нархларининг хамёнбоплиги тадбиркорликни янги бошловчилар учун қулайлик яратади.  

Бу ерда шу каби яна юзлаб технологияларни кўрасиз. Эътиборли жиҳати улар билан танишишнинг ўзиёқ кишига ўз имконияти ва шарт-шароитидан келиб чиққан ҳолда қандай тадбиркорликни йўлга қўйиш ёки ўз ишлаб чиқариш линиясини яна қандай ускуналар билан бойитиш мумкинлиги ҳақида янги ғоялар тақдим этади.

– Кўргазма ҳақида эшитиб, Нишон туманидан келдик, – дейди тадбиркор Бекзод Дўстмуродов. – Ҳозирги кунда мебель ишлаб чиқариш цехини ишга туширганмиз. Биласиз, маҳсулотнинг қанчалик сифатли бўлиши, дизайни, таннархи арзонлиги аввало технологияга боғлиқ. Шу боис мебелчилик йўналишидаги янги технологиялар, уларнинг имкониятлари билан танишиб, фаолиятимиз учун зурур бўлганларини харид қилиш режамиз бор.

Шунингдек, доимий кўргазмада ҳудуддаги 23 та саноат корхонасида тайёрланаётган 100 дан зиёд турдаги ҳамда “Ўзбекнефтегаз” АЖ тизимидаги корхоналар эҳтиёжи учун ишлаб чиқаришни ўзлаштириш таклиф этилаётган 27 турдаги маҳсулотлар ҳақида ҳам маълумот олиш мумкин.

Ўлмас Баротов, Жамшид Норқобилов (сурат), ЎзА