O‘zbekiston Respublikasi Prezidentining 2020 yilning 30 iyunida qabul qilingan “Aholi tomorqalaridan foydalanish samaradorligini oshirishning qo‘shimcha chora- tadbirlari to‘g‘risida” gi qarorida belgilangan vazifalar ijrosi joylarda ta’minlanmoqda.
Unga ko‘ra, suv ta’minoti og‘ir hududlardagi aholi tomorqalari va qishloq xo‘jaligida foydalanilmayotgan yer maydonlariga suv chiqarishni davlat tomonidan qo‘llab-quvvatlanishini aholiga tushuntirish maqsadida Jizzax viloyatida Respublika o‘quv amaliy ko‘rgazmali seminari bo‘lib o‘tdi.
Unda Suv xo‘jaligi vazirligi, O‘zbekiston fermer, dehqon xo‘jaliklari va tomorqa yer egalari kengashi, Ekologiya va atrof – muhitni muhofaza qilish davlat qo‘mitasi, Davlat geologiya va mineral resurslar qo‘mitasi vakillari ishtirok etdi.
-Aholiga tomorqa yerini sug‘orish uchun vertikal sug‘orish artezian quduqlarini burg‘ulash ishlarini tizimli tashkil etish, bu bilan bog‘liq harajatlarni qoplab berish tartibi borasida atroflicha tushintirish berdik,-deydi O‘zbekiston fermer, dehqon xo‘jaliklari va tomorqa yer egalari kengashi bo‘lim boshlig‘i N.Rahmonov.
–Ayni vaqtda seminar ishtirokchilariga manzilli dasturga kiritilgan suv ta’minoti og‘ir G‘allaorol tumani, Guliston MFY sidagi aholi tomorqasini sug‘orish uchun vertikal sug‘orish artezian quduqlarini burg‘ulash ishlarini tajriba sifatida ko‘rsatdik.
Qayd etish kerakki, manzilli dasturga ko‘ra, joriy yilda yurtimizning 104 ta tumanidagi 967 ta MFY da 2721 ta artezian quduqlari qazildi. Natijada 9742 gektar maydonni suv bilan ta’minlash rejalashtirilgan edi, joriy yilning 1 noyabr holatiga 234 ta MFY da 915 ta artezian quduqlari qazilishi natijasida 2851 gektar maydonga suv chiqarildi.
Uchrashuvda Prezidentimizning 2020 yil 11 maydagi “Respublika hududlarini qishloq xo‘jaligi mahsulotlari yetishtirishga ixtisoslashtirish bo‘yicha qo‘shimcha chora-tadbirlar to‘g‘risida” gi qaroriga ko‘ra, Jizzax viloyatining ayrim hududlarida artezian quduq qazish va yer osti suvlaridan foydalanish maqsadida 2 dona burg‘ilash mashinalari ham beg‘araz yordam sifatida berilgani qayd etib o‘tildi.