АҚШ оммавий ахборот воситалари куни кеча Флорида штатига ёпирилган “Милтон” тўфонининг дастлабки қурбонлари ҳақида хабарлар тарқатмоқда.

“Вашингтон пост” маҳаллий ҳокимият идораларига таяниб, ҳозиргача офат қурбонлари сони 14 кишига етганини ёзди.

Аввалроқ ички хавфсизлик вазири Алехандро Майоркас табиий офатдан камида 10 киши ҳалок бўлганини маълум қилганди.

Аниқланишича, чоршанба куни торнадо оқибатида олти киши ҳаётдан кўз юмган. Волуша округи маъмурияти тўрт кишининг ўлимини қайд этди. Улар орасида уйига дарахт қулаган икки аёл ҳам бор. Санкт-Петербург ва Цитрус округида ҳам шунча одам ҳалок бўлган.

Чоршанба куни кечқурун Флориданинг ғарбий соҳилига етиб келган “Милтон” тўфони Саффир-Симпсон шкаласи бўйича 3-тоифа даражасини кўрсатди. Бунгача ҳам бир неча довул штатдан ўтиб, қўшимча вайронагарчиликка сабаб бўлди.

“Power Outage.us” мониторинг портали ёзишича, табиий офат туфайли Флориданинг тахминан 3,4 миллион аҳолиси электр таъминотидан узилди.

7 октябрь куни Президент Жо Байден штатда фавқулодда ҳолат жорий этиш тўғрисидаги фармонни имзолади. Шунингдек, у маҳаллий ҳукуматларга федерал миқёсда ёрдам кўрсатиш бўйича кўрсатма берган.

Иқтисодчилар аллақачон тўфон келтирадиган молиявий зарарни ҳисоблашга киришган. Масалан, “Fitch Ratings” агентлиги маълум қилишича, 2024 йил бу рақам 100 миллиард доллардан ошаркан. Шунингдек, тегишли ҳужжатда қайд этилишича, Милтон туфайли саноатда суғурталанган йўқотиш янада кўпроқ. Бундай ҳолат кетма-кет бешинчи йил такрорланиши. 2022 йил “Ян” тўфони содир бўлганда мамлакат 60 миллиард доллар зиён кўрган эди.

2005 йил 22-30 август кунлари юз берган Катрина тўфони АҚШ тарихидаги энг ҳалокатли ҳодиса сифатида тарихда қолган. Ўшанда табиий офатдан бир ҳафта ичида 1836 киши ҳалок бўлган. Қолаверса, Луизиана штатидаги Янги Орлеан шаҳри, деярли, бутунлай вайрон бўлган. Миллий об-ҳаво хизмати маълумотига кўра, зарар 125 миллиард долларга етган. Бу миқдорнинг 60 миллиарди суғурта компаниялари ҳиссасига тўғри келган.

С.Раҳимов, ЎзА