Жорий йилнинг 6-22 февраль кунлари Италиянинг Милан ҳамда Кортина-д’Ампессо шаҳарларида XXV қишки Олимпия ўйинлари бўлиб ўтади.

Дунёнинг 93 мамлакатидан 2871 нафар спортчи қатнашадиган мазкур нуфузли мусобақада ўзбекистонлик неча нафар атлет иштирок этиши кутилмоқда?

Ўзбекистон Миллий Олимпия қўмитаси маълумотига кўра, бошланишига саноқли кунлар қолган тўрт йилликнинг энг муҳим комплекс мусобақасида Ўзбекистон спорт жамоаси 4 нафар спортчи билан иштирок этиши белгиланганди.

"Милан-Кортина-2026" қишки Олимпия ўйинлари саралаш цикли якунига кўра, Ватанимиз шарафини Дмитрий Чигирев ҳамда Екатерина Гейниш фигурали учишнинг жуфтлик, Медет Назаров тоғ чанғисининг слалом ва гигант-слалом, Даниил Ейбог шорт-трекнинг 500 метр масофага югуриш йўналишларида Олимпиада йўлланмаларига эга чиққанди.

Бироқ тайёргарлик жараёнида Дмитрий Чигирев жароҳат олиб, Олимпиадагача тиклана олмаслиги маълум бўлди. Бу, "Милан-Кортина-2026" қишки Олимпия ўйинларида спортчиларимиз фақат тоғ чанғиси ва шорт-трек дастурларида қатнашишини англатмоқда.

Т.Рўзиев, ЎзА