Microsoft компанияси видеоўйинлар ишлаб чиқарувчи дунёдаги энг йирик компаниялардан бири бўлган Activision Blizzardни сотиб олиш режасини маълум қилди.

Харид нархи 68,7 миллиард доллар, дейилмоқда. "Бугун Microsoft компанияси Activision Blizzardни сотиб олиш режасини эълон қилди. Activision Blizzard ўйинлар ишлаб чиқариш ва интерактивли кўнгилочар контентларни нашр қилиш соҳасида етакчи ҳисобланади", — дейилади компания тарқатган маълумотда.

Microsoft ҳар бир акция учун 95 доллар тўлаб, харидни 2023 молиявий йилда тугаллашни мўлжалламоқда. Кутилишича, шундан кейин Microsoft ўйинлар ишлаб чиқарувчи компаниялар орасида даромад олиш бўйича Tencent ва Sony дан кейинги дунёдаги учинчи йирик компанияга айланади. Activision Blizzard бизнесига Microsoft Gaming бош директори Фил Спенсер раҳбарлик қилади.

Харид келишувига Activision, Blizzard ва King, шунингдек, Warcraft, Diablo, Overwatch, Call of Duty ва Candy Crush студиялари киритилади. Мазкур хабар тарқалгандан кейин Activision Blizzard акциялари қиймати тахминан учдан бирга қимматлашиб кетди.