Ўтган якшанба куни Мексика пойтахти Мехикода Президент Андрес Мануэл Лопес Обрадор тарафдорлари иштирокида оммавий юриш бўлиб ўтди. Унда бир миллиондан зиёд киши иштирок этгани айтилмоқда.

“Бу Президент Лопес Обрадор билан биргаликда ўтган тарихий юриш бўлди. Ҳеч қандай кутилмаган кўнгилсиз ҳодиса рўй бермади, ҳатто бирорта ойна ҳам синмади” дейилади хабарда. Жамоатчилик хавфсизлиги бошқармасининг маълум қилишича, намойишда 1,2 миллион киши иштирок этган.

Манифестантлар қаршисида давлат раҳбари чиқиш қилиб, аҳолига ўзи раҳбарлик қилаётган ҳукуматнинг муваффақиятлари, жумладан, энг кам ойликнинг оширилиши, коронавирус пандемияси оқибатида юзага келган иқтисодий қийинчиликларни енгиб ўтгани, ижтимоий дастурларнинг ривожланаётгани, шунингдек, жиноятчилик даражаси пасайгани ҳақида гапирган.

Мухолифатчиларнинг таъкидлашича, оммавий тадбирлар ёрдамида ҳукумат халқни бартараф қила олмаган муаммолардан чалғитмоқда.

Мексика президенти олти йиллик муддатга сайланади ва давлатнинг олий лавозимига қайта номзодини кўрсата олмайди. Лопес Обрадорнинг президентлик инаугурацияси 2018 йил 1 декабрда бўлиб ўтган эди. Ўшанда у қайта сайланмаслигини таъкидлаб, ҳар қандай вазиятда ҳам иккинчи муддатга номзодини кўрсатмаслигини айтган эди.

Ўтган октябрда ўтказилган жамоатчилик фикрини ўрганиш бўйича сўров натижалари мексикаликларнинг 56 фоизи ҳукумат фаолиятини қўллаб-қувватлашини кўрсатган.

Ҳозирда ушбу Лотин Америкаси мамлакатининг нуфуси 129 миллион кишини ташкил этади.