Бугун Олий Мажлис Қонунчилик палатасидаги ЎзХДП фракциясининг йиғилиши бўлиб ўтди. Унда бир нечта қонун лойиҳалари қизғин муҳокама қилинди.

Йиғилишда “Ўзбекистон Республикасининг айрим қонун ҳужжатларига ижара ва лизинг муносабатларини тартибга солишга қаратилган ўзгартиш ва қўшимчалар киритиш тўғрисида”ги қонун лойиҳаси кўриб чиқилди.  

Таъкидланганидек, мазкур қонун лойиҳаси ижара ва лизинг муносабатларидаги қонунбузилиш ҳолатларининг олдини олиш, шунингдек, ушбу соҳада жисмоний ва юридик шахсларнинг мулкий ҳуқуқлари кафолатини таъминлашга хизмат қилади. Қонун лойиҳаси билан кейинчалик сотиб олиш шарти билан ижарага ёки лизингга бериш билан боғлиқ ҳуқуқий муносабатлар такомиллаштирилади, автотранспорт воситаларини ижарага ёки лизингга беришдаги фирибгарлик жиноятларининг олди олинади, Ижара ёки лизингга олувчиларнинг мулк ҳуқуқлари кафолатлари таъминланади.  

Шунингдек, фракция аъзолари “Ўлчаш воситаларини қиёслашдан ўтказиш соҳасига хусусий секторни кенг жалб қилиш орқали ушбу соҳадаги мавжуд монополиялар бартараф этилиши муносабати билан “Метрология тўғрисидаги” Ўзбекистон Республикасининг Қонунига ўзгартиш ва қўшимчалар киритиш ҳақида”ги қонун лойиҳасини муҳокама қилди.  

Мазкур қонун лойиҳаси метрология хизматларини кўрсатиш соҳасида хусусий секторни кенг жалб қилиш ҳамда бу борадаги давлат ташкилотларининг эксклюзив ҳуқуқларини бекор қилиш орқали соҳада мавжуд монополияни бартараф этиш мақсадида ишлаб чиқилди.

Қонун лойиҳасида ўлчаш воситаларини қиёслаш хизматлари давлат ва хўжалик бошқаруви органлари ҳисобланмайдиган юридик шахсларнинг метрология хизматлари томонидан кўрсатилишига рухсат бериш таклиф этилмоқда. Шунингдек, лойиҳа билан ўлчаш натижалари давлат аҳамиятига эга бўлган ўлчаш воситалари туркумларининг рўйхати Ҳукумат томонидан тасдиқланиши белгиланмоқда.    

Фракция аъзолари қонун лойиҳасини такомиллаштириш юзасидан таклиф-тавсиялар берди, айрим саволлар билан мурожаат қилди.  

Муҳтарама Комилова, ЎзА