Бугун Иқтисодиёт ва молия вазирлиги ва “Metito Utilities Limited” компанияси вакиллари ўртасида учрашув ўтказилди. Бу ҳақда вазирликнинг жамоатчилик билан алоқалар бошқармаси маълум қилди.

Унда томонлар давлат-хусусий шерикликка асосланган “Наманган шаҳрида оқова сувларни тозалаш иншоотини қуриш” ҳамда “Наманган вилоятида насос станцияларини реконструкция қилиш” янги инвестиция лойиҳаларини муҳокама қилди.

Таъкидлаш керакки, “Metito Utilities Limited” компаниясининг бош қароргоҳи Бирлашган Араб Амирликларининг Дубай шаҳрида жойлашган. Бугунги кунда компания муҳандислик ва қурилиш, коммунал хизматлар, эксплуатация ва техник хизмат кўрсатиш, кимёвий ечимларга ихтисослашган сув таъминоти ва оқова сув объектлари қурилиши бўйича етакчилик қилади.

Учрашув якунида томонлар қўшма лойиҳаларнинг яқин фурсатларда муваффақиятли якунланишига умид билдириб, ҳамкорликни янада мустаҳкамлашга келишиб олди.

Н.Зиёдуллаева, ЎзА