Германия құрамасының бұрынғы ойыншысы Месут Озил футболшылық мансабын аяқтайтынын ресми түрде жариялады.

Бұл туралы ол әлеуметтік желідегі парақшасында хабарлап, «Ойлай келе мен кәсіби футболдан кететінімді жариялаймын. 17 жылға жуық кәсіби футболшы болу мәртебесіне ие болдым және осы мүмкіндік үшін өте ризамын. Бұл ұмытылмас сәттер мен эмоцияларға толы таңғажайып саяхат болды. Мен өз клубтарыма алғыс айтқым келеді: «Шальке 04», «Вердер Бремен», «Реал Мадрид», «Арсенал», «Фенербахче», «Стамбул Башакшехир». Сондай-ақ мені қолдаған жаттықтырушылар мен дос болған әріптестеріме

Менің отбасы мүшелеріме және ең жақын достарыма ерекше алғыс айтамын. Олар бірінші күннен бастап менің саяхатымның бір бөлігі болды және маған жақсы және жаман кездерде үлкен махаббат пен қолдау көрсетті. Қандай жағдай болмасын және қай клубтың өкілі болсам да, маған шексіз сүйіспеншілік танытқан барлық жанкүйерлеріме рахмет.

Мені әлеуметтік желідегі парақшаларымнан анда-санда көріп тұрасыз. Кездескенше!», деп жазған Озил Twitter-де.

34 жастағы жартылай қорғаушы осы маусымды түріктің «Стамбул Бешакшехир» клубында өткізді. Озил бұл маусымда клуб сапында бар болғаны 5 ойын өткізді.

Еске салайық, Озил 2014 жылы Германия құрамасы сапында әлем чемпионы атанған болатын. Ол 2010 жылғы әлем чемпионатында қола жүлдегер атанды.