Ўзбекистон мудофаасига кўмаклашувчи “Ватанпарвар” ташкилоти Қизилтепа тумани ўқув спорт техника клуби томонидан ташкил этилган мусобақада тумандаги 5, 9, 22 ва 34-умумтаълим мактаблари ўқувчилари ўзаро баҳслашди.

Шунингдек, ўқувчи-ёшларга ЎСТК бошлиғи ўринбосари Р.Тошева томонидан Президентимизнинг 2017 йил 5 июлдаги “Ёшларга оид давлат сиёсати самарадорлигини ошириш ва Ўзбекистон ёшлар иттифоқи фаолиятини қўллаб-қувватлаш тўғрисида”ги фармони, 2018 йил 12 декабрдаги “Ёшларни ватанпарварлик руҳида тарбиялаш ҳамда чақирилувчиларни ҳарбий-техник мутахассисликлар бўйича тайёрлаш тартибини такомиллаштириш бўйича қўшимча чора-тадбирлар тўғрисида”ги қарори мазмун-моҳияти ҳақида атрофлича маълумот берилди.

26 нафар ҳаваскор мерган иштирок этган мусобақада йигитлар ўртасида фахрли 1-ўринни 22-умумтаълим мактаби ўқувчиси Д.Каримов қўлга киритди. 2-ўрин 5-умумтаълим мактаби ўқувчиси Ш.Тошпўлатов, 3-ўрин эса 9-умумтаълим мактаби ўқувчиси С.Раззоқовга насиб этди.

Қизлар ўртасида кечган мерганлик баҳсида ҳам 22-умумтаълим мактаби ўқувчисининг қўли баланд келди. Ш.Жалолова тенгдошларига нисбатан мерганлик бобида тенгсиз эканини исботлаб, 1-ўринни эгаллади. 2- ва 3-ўринлар 9-умумтаълим мактаби ўқувчиларига насиб этди. Жумладан, 2-ўринга С.Шомуродова, 3-ўринга эса Д.Ҳалимова сазовор бўлди.

Мусобақа ғолиб ва совриндорларига фахрий ёрлиқ ва эсдалик совғалари топширилди.