Наманганда мудофаага кўмаклашувчи “Ватанпарвар” ташкилоти вилоят кенгаши ташаббуси билан спортнинг пневматик қуролдан ўқ отиш бўйича Наманган вилояти ҳокими кубогининг биринчи босқичи ўтказилди.

2026 йилги спорт ва оммавий жисмоний тарбия тадбирлари тақвим режаси асосидаги мазкур мусобақа Наманган шаҳри ўқув-спорт техника маркази қошидаги “Ўқ отиш” мажмуасида ташкил этилди. Унда вилоят шаҳар ва туманлари жамоалари таркибида 110 нафар ўғил-қиз иштирок этди. 

Мусобақанинг турли йўналишлари бўйича ўтказилган беллашувлар натижаларига кўра, энг юқори кўрсатгич қайд этган Наманган шаҳридаги 1-сонли ўқув-спорт маркази жамоаси фахрли биринчи ўринни қўлга киритди. Вилоят техник ва амалий спорт турлари маркази иккинчи ўринга сазовор бўлди. Мусобақанинг илк босқичида Тўрақўрғон тумани ўқув-спорт техника маркази спортчилари кучли учликдан жой олди. 

“Ватанпарвар” ташкилоти Наманган вилояти кенгаши раиси Аҳмаджон Аълохўжаев кубокнинг ғолиб ва совриндорларига фахрий ёрлиқ, медаллар ва эсдалик совғаларини топширди. 

Оқилхон Дадабоев, ЎзА.