Ўзбекистон Ёзувчилар уюшмаси ёш ижодкорларни қўллаб-қувватлашга доимий эътибор қаратиб келмоқда. Уюшманинг муҳташам анжуманлар залида бўлиб ўтган "Менинг биринчи китобим" лойиҳасида чоп этилган китоблар тақдимоти ҳам бу фикримизнинг яна бир ёрқин намунасидир.

Ушбу лойиҳа мамлакатимиздаги атоқли адиблар номи билан аталадиган ижод мактабларининг истеъдодли ўқувчилари ижодини қўллаб-қувватлаш ва тарғиб этишга мўлжаллангани билан аҳамиятли.

Ўзбекистон Республикаси Президентининг 2024 йил 1 апрелдаги "Ижод мактаблари фаолиятини такомиллаштириш чора-тадбирлари тўғрисида"ги қарорида Ижод мактабларида истеъдодли ва таниқли адиблар билан маҳорат дарслари ташкил этиш, ёш ижодкорларнинг анъанавий Зомин семинарида ҳар бир мактабдан 5 нафардан ўқувчи иштирокини таъминлаш, ҳар ўқув йилида ижод мактабларидан икки нафардан ўқувчи ижодини китоб ҳолида чоп этиш вазифаси белгиланган эди. 

Айни вақтда Ёш ижодкорларнинг анъанавий Зомин семинарида иштирок этадиган ўқувчиларни саралаб олиш учун танловнинг мактаб босқичлари ўтказилди ва жами 45 нафар ўқувчи Зомин семинарида иштирок этиши кўзда тутилмоқда. 

2024 йилда ўтказилган семинар натижаларига кўра, истеъдодли деб топилган ўқувчилардан 18 нафарининг илк китоблари нашрга тайёрланган эди. 2024-2025 ўқув йилининг аввалги чорагида 9 нафар ўқувчи китоби чоп этилиб, тақдимоти ўтказилган бўлса, бугун яна 9 нафар ўқувчининг илк китоблари тақдимоти бўлиб ўтди. 

Ёзувчилар уюшмаси раисининг биринчи ўринбосари Минҳожиддин Мирзо икки ташкилот ўртасидаги ҳамкорлик натижасида амалга оширилган ибратли ишлар ҳақида батафсил гапирди. 

Тақдимот тадбирида сўзга чиққанлар ижодкор ўқувчиларга бўлган бу эътибор келгусида, албатта, ўз натижасини беришини қайд этдилар. 

Муаллифларга Ёзувчилар уюшмаси томонидан чоп этилган китоблардан совға қилинди.

Н.Усмонова, ЎзА