– Prezidentimizning 2017 yil 13 sentyabrdagi “Kitob mahsulotlarini nashr etish va tarqatish tizimini rivojlantirish, kitob mutolaasi va kitobxonlik madaniyatini oshirish hamda targʻib qilish boʻyicha kompleks chora-tadbirlar dasturi toʻgʻrisida”gi qarori ijrosi doirasida viloyatda keng qamrovli ishlar amalga oshirilayotir, – deydi viloyat matuot va axborot boshqarmasi qoshidagi “Ziyo” nashriyoti direktori Mohira Yoʻldosheva. – Jumladan, Guliston, Boyovut, Mirzaobod, Sardoba va boshqa bir qator tumanlar hokimlarining amaliy qoʻllab-quvvatlashi samarasida ana shu tumanlarda istiqomat qilayotgan iqtidorli yoshlarning sheʼrlari saralab olinib, viloyat matbuot va axborot boshqarmasi qoshidagi “Ziyo” nashryotining nufuzli komissiyasi koʻrigidan oʻtgan nazm va nasriy asarlari toʻplam holiga keltirilib, bosmadan chiqarilayotgani tahsinga loyiq. 

Mirzaobod tumanida, shu hududda istiqomat qiluvchi iqtidorli yoshlarning sheʼrlaridan tashkil topgan “Adabiyot avlodlari” deb nomlangan toʻplamning taqdimot marosimi boʻlib oʻtdi. Shu munosabat bilan oʻtkazilgan tadbirda tuman hokimi Hamidullo Abdullayev birinchi bor kitobi bosmadan chiqqan 92 nafar mirzaobodlik yosh, havaskor shoirlarning sheʼrlaridan tuzilgan “Adabiyot avlodlari” kitobini mualliflarga topshirdi.

Xuddi shunday talbirlar viloyatdagi Boyovut, Guliston va Sardoba tumanlarida ham boʻlib oʻtdi.