Президент Шавкат Мирзиёев 7 наурыз күні өнеркәсіп үшін маңызды минералды шикізат базасын кеңейту және қосылған құны жоғары өнімдер өндіру бойынша тұсаукесермен танысты.

Республика аумағында вольфрам, молибден, магний, литий, германий, графит, ванадий және титан сынды 30-дан астам өнеркәсіп үшін маңызды минералдар бар. Алайда бұған дейін бұл мүмкіндіктер толық пайдаланылмаған. Пайдалы қазбаларды барлау, техногендік қалдықтарды қайта өңдеу арқылы құнды элементтерді бөліп алу және олардан өнім өндіруге инвестиция тартылмаған еді.

Соңғы жылдары ұйымдастырушылық негіз қалыптасып, жоғары қосылған құнды өнімдер алу жұмыстары басталды. Таныстырылымда тау-кен өнеркәсібі және геология министрі осы саладағы мүмкіндіктер жөнінде ақпарат берді.

Алдағы үш жылда 28 түрлі сирек минерал бойынша 2,6 млрд долларлық 76 жобаны іске асыру жоспарланып отыр. Бұл мақсатта шикізат базасын кеңейту үшін геологиялық барлау және ғылыми-зерттеу жұмыстарына қосымша қаржы бөлу көзделген.

Басты міндет – заманауи технологияларды пайдалану арқылы қымбат шикізатты кеннен бөліп алу, тазалығын арттыру және жоғары құнды өнімдер жасау екені атап өтілді. Мәселен, «Жіңішке» кеніндегі вольфрам концентратын байыту арқылы оның қосылған құны 2 есе артады. Қазіргі уақытта осындай 18 жоба әзірленген.

Салада «шикізат – қайта өңдеу – ғылым мен технология – дайын өнім» тізбегін кеңейту мақсатында молибден мен вольфрамға бай Ташкент және Самарқанд облыстарында технопарктер құру ұсынылды.

Мемлекет басшысы бұл бағытта өнеркәсіптік сынақтар жүргізу және технология трансферін жүзеге асыру, заманауи зертханалар мен оқу орталықтарын ашу бойынша тапсырмалар берді. Жалпы, «төртінші өнеркәсіптік революция» дәуірінде лайықты орын алу үшін берік негіз қалыптастыру қажет екені айтылды.