Өзбекстан Республикасы Президенті Шавкат Мирзияев 19 шілдеде Өзбекстанға іскерлік сапармен келген Иран Ислам Республикасының вице-президенті Сорена Сатториді қабылдады.

Кездесуде Өзбекстан-Иран көп қырлы қарым-қатынастарды одан әрі кеңейту мәселелері талқыланды. Ғылым, инновация және технология саласындағы бірлескен бағдарламалар мен жобаларды ілгерілетуге ерекше назар аударылды.

Сұхбат басында Сорена Саттори Иран Президенті Ибрагим Раисидің Мемлекет басшысына сәлемі мен ізгі тілегін жеткізді.

Соңғы жылдары екіжақты диалог пен өзара алмасулардың жанданғаны байқалып отырғаны атап өтілді. Сауда көрсеткіштері мен ынтымақтастық жобаларының саны да артып келеді. Өткен жылы тауар айналымы 73 пайызға өссе, биылғы жылдың басынан бері 22 пайызға артқан.

Бірлескен ғылыми-тәжірибелік зерттеулер жүргізу, жеке секторды ғылыми-зерттеу және венчурлық бастамаларды қаржыландыруға тарту, жоғары оқу орындары арасындағы бағдарламаларды қолдау, био және нанотехнологиялар, IT, фармацевтика және басқа да салаларда бірлескен жобаларды жүзеге асыруда практикалық ынтымақтастықты кеңейтуге мүмкіндіктер бар екені айтылды.

Келешекте, соның ішінде алдағы Өзбекстан-Иран инновациялық форумы мен іскерлік іс-шараларда бірлескен шешімдер мен қол қойылатын келісімдерді жүзеге асыру үшін «жол картасын» қабылдау туралы келісімге қол жеткізілді.