Өзбекстан Республикасының Президенті Шавкат Мирзиёев 15 маусым күні Самарқанд қаласында жұмыс сапармен жүрген «БҰҰ Туризм» (Дүниежүзілік туристік ұйым) Бас хатшысы Зураб Пололикашвилимен кездесті.

Кездесуде Өзбекстан мен БҰҰ-ның осы мамандандырылған институты арасындағы көпжақты ынтымақтастықты одан әрі кеңейту мәселелері талқыланды.

2023 жылдың қазан айында Самарқандта өткен ұйымның 25-ші сессиясында қол жеткізілген уағдаластықтарды жүзеге асыру барысы мен алға қойылған бастамалар қаралды. Өзбекстанның бастамасы бойынша БҰҰ Бас Ассамблеясының 2027 жылды Халықаралық тұрақты және өміршең туризм жылы деп жариялау туралы қарарының қабылдануы жоғары бағаланды.

Ұйымның заманауи туристік инфрақұрылымды дамыту және елімізде туризмді танымал ету бойынша Өзбекстанның стратегиялық серіктесіне айналғаны зор қуанышпен атап өтілді.

Туристер үшін қолайлы жағдайлар жасау және нысандарды құру, зиярат және мәдени-танымдық туризмді, оның ішінде ішкі туризмді дамытуға бағытталған бағдарламалар мен жобаларды жүзеге асыру бойынша бірлескен жұмыстарды жалғастырудың маңыздылығы атап өтілді.

Самарқандта жұмыс істейтін Халықаралық туризм академиясының мүмкіндіктерін пайдалана отырып, қонақжайлылық және қызмет көрсету саласында білікті кадрлар даярлауға ерекше көңіл бөлінді.

Өзбекстанда туризмді танымал ету мақсатында жергілікті туроператорлардың ірі халықаралық туристік жәрмеңкелер мен көрмелерге қатысуын қолдау бойынша практикалық ынтымақтастық кеңейтілетін болады.