Мельбурн шаҳрида икки ҳафта давом этган теннис бўйича йилнинг илк «Катта дубулға» турнири — «Australian Open» мусобақаси ўз якунига етди. Дунё теннисининг энг нуфузли мусобақаларидан бири саналган ушбу турнирда эркаклар ва аёллар ўртасидаги финал баҳслари катта қизиқиш билан кузатилди.

Эркаклар ўртасидаги ҳал қилувчи учрашувда дунёнинг биринчи ракеткаси, испаниялик Карлос Алькарас ҳамда рейтингда тўртинчи ўринни эгаллаб турган сербиялик тажрибали Новак Жокович ўзаро куч синашди.

Қизиқарли ва кескин курашларга бой кечган финал баҳси 2:6, 6:2, 6:3, 7:5 ҳисобида Карлос Алькарас фойдасига ҳал бўлди. Ушбу ғалаба орқали испаниялик теннисчи 2000 рейтинг очкоси ҳамда 2 миллион 889 минг 230 АҚШ доллари миқдорида мукофот пулига сазовор бўлди. Новак Жокович эса мусобақани 1300 очко ва 1 миллион 496 минг 830 АҚШ доллари билан якунлади.

Аёллар ўртасидаги финал баҳсида дунёнинг биринчи ракеткаси, Беларусь вакили Арина Соболенко ҳамда қозоғистонлик Елена Рибакина ўзаро тўқнаш келди. 2 соатдан ортиқ давом этган учрашувда Елена Рибакина 6:4, 4:6, 6:4 ҳисобларида ғалаба қозониб, фаолиятида илк бор «Australian Open» чемпионлигига эришди.

Мазкур муваффақият қозоғистонлик теннисчига 2000 рейтинг очкоси ҳамда қарийб 2 миллион 900 минг АҚШ доллари миқдорида мукофот пулини тақдим этди.

Шу тариқа, «Australian Open – 2026» турнири ёш авлод вакилларининг жаҳон теннисидаги устунлигини яна бир бор намоён этган ҳолда ўз якунига етди.

Жавоҳир Тошхўжаев, ЎзА