Бугун 20 июнь куни тонг саҳарда пойтахтимиздаги Ислом Каримов халқаро аэропортида Мексиканинг Леон шаҳрида оғир атлетика бўйича якунланган ўсмирлар ўртасидаги Жаҳон чемпионатида 8 та кумуш ва 2 та бронза медалига мушарраф бўлган оғир атлетикачиларимиз тантанали кутиб олинди.

Дунёнинг 40 та давлатидан 205 нафар спортчи иштирок этган Жаҳон чемпионати баҳслари 10 та вазн тоифасида ўтказилди. Истеъдодли спортчиларимиз 4 та вазнда медаллар учун курашди. 

Чемпионатда умумжамоа ҳисобида совринли ўринларни эгаллаган жамоалар 10-15 нафар спортчи билан қатнашган ҳолда 10 та медалга эга чиққан бўлса, терма жамоамиз аъзолари 4 нафар спортчи билан умумий медаллар сони бўйича улар кўрсатган натижани қайд этишди. Масалан, Мексика мусобақаларида энг кўп олтин-кумуш-бронзага эгалик қилган Туркия, Колумбия, Қозоғистон жамоаларининг 15 нафарга яқин спортчиларининг 5-6 таси совринли ўринларни эгаллаб, қолганлари чемпионатни совринсиз якунлаган бир пайтда Ўзбекистон оғир атлетикачиларининг океан ортида дунё биринчилигида совринли ўринларга эришганлиги натижа юз фоиз уддаланганлигидан далолат. 
Яна бир ўзига хос ҳолат шунда бўлдики, Мексика супасида иштирокчи давлатларнинг деярли тенг ярми 10 нафар атрофидаги спортчилар билан қатнашган бўлса-да, совринли ўринларга эга чиқа олишмади. 

Кутиб олиш маросимида иштирок этган Спортни ривожлантириш вазири ўринбосари Шаҳрулло Маҳмудов оғир атлетикачиларимиз Жаҳон чемпионатида гарчи олтин медални қўлга киритмаган бўлса ҳам, 4 нафар спортчимизнинг барчаси совриндорлар қаторидан жой олиши келгуси йилги чемпионатларга муносиб захира яратилганлиги ва бу эртанги мусобақаларда ўз тасдиғини топишини таъкидлади.

Жаҳон оғир атлетикаси учун йилнинг энг нуфузли мусобақаларидан бири якунланди. Энди дунё “тош полвонлари”нинг Осиё қитъаси вакиллари нигоҳи жорий йил 15-25 июль кунлари пойтахтимизда ўсмирлар ва ёшлар ўртасида ўтадиган қитъа чемпионатига қаратилади.

Тўлқин Рўзиев, ЎзА