Мексикалик журналист, Monitor Michoacán янгиликлар порталининг директори Армандо Линарес Мичоакан штатида ўлдириб кетилди.

У шу йилнинг ўзида жиноятчилар қурбонига айланган еттинчи журналист ҳисобланади.

Мичоакан штати бош прокуратурасидан маълум қилинишича, журналистнинг ўлдириб кетилгани ҳақида сешанба куни маълум қилинган. Журналист Ситакуаро шаҳридаги уйи остонасида отиб кетилгани айтилмоқда.

Sol de Mexico нашрининг ёзишича, 31 январь куни  Линарес ҳамкасби, Monitor Michoacán нашрида ишлаётган журналист Роберто Толедонинг ўлдириб кетилганини қоралаб чиққан эди. Ўшанда Линарес жиноий гуруҳлардан таҳдидли огоҳлантириш олганини айтиб, ҳукуматдан уни ҳимоя қилиш учун чора кўришни талаб қилган.

Мексикада шу йилнинг ўзида етти нафар журналист жиноий гуруҳлар қурбонига айланди. Январь ойида навбатдаги ОАВ вакили ўлдириб кетилганидан сўнг мамлакатнинг 40 та шаҳрида журналистлар норозилик намойишларига чиқиб, ҳукуматдан хавфсизликни таъминлаш ва қарийб ҳар доим жазосиз қолдирилаётган жиноятларни тергов қилишни талаб қилишди.

Сўз эркинлигига қарши қилинган жиноятчилик  бўйича кураш олиб бораётган махсус прокуратура беш йил давомида ОАВ вакилларига нисбатан амалга оширилган қонунбузарликлар бўйича аниқланган факт юзасидан 1 минг 140 дан ортиқ иш қўзғаган ва атиги 10 та айблов жазосини чиқаришга эришган. Мазкур жиноий ишларда жазосиз қолиш даражаси 99 фоиздан юқори экани айтилади хабарда.

Articulo 19 ҳуқуқни ҳимоя қилувчи ташкилоти маълумотига кўра, 2021 йилда Мексикада етти нафар журналист ўлдириб кетилди. Бу дунё бўйича энг юқори кўрсаткич ҳисобланади. Андрес Мануэль Лопес Обрадор  президентлик қилаётган атиги уч йил ичида мамлакатда ОАВ ходимларидан 31 киши жиноятчилар қурбони бўлди. Хабарда ушбу қотилликлар катта эҳтимол билан уларнинг касбий фаолиятига боғлиқ экани  таъкидланади.