Мексика президенті Андрес Мануэль Лопес Обрадор Сыртқы істер министрі Алисия Барсенаға Эквадормен дипломатиялық байланыстарды үзуді тапсырды.

Бұл туралы Мексика мемлекетінің басшысы X микроблогында мәлімдеген.

Бұл қадам Эквадор полициясы Эквадордың бұрынғы вице-президенті Хорхе Глас 2023 жылдың желтоқсанынан бері тұрып жатқан Китодағы Мексика елшілігіне күштеп кіргеннен кейін жасалған. Ол Мексикадан саяси баспана сұрады және оған полиция елшілікке басып кіргенге дейін бірнеше сағат бұрын рұқсат алды.

Өз кезегінде Мексиканың Сыртқы істер министрі Алисия Барсена Мексика Эквадорды халықаралық құқықты бұзды деп айыптап, Халықаралық сотқа шағымданатынын мәлімдеген. СІМ басшысы атап өткендей, елшілікке басып кіру кезінде бірнеше мексикалық дипломат жараланып, жарақан алған.