Пойтахтимизнинг Яшнобод туманидаги 52-ихтисослаштирилган мактабда 3 декабрь - Халқаро ногиронлар кунига бағишланган "Меҳрнинг нархи қанча?" шиори остида очиқ эшиклар куни ўтказилди.

3 декабрь - Халқаро ногиронлар куни 

Тадбирда Тошкент шаҳар ва туман ҳокимлиги масъуллари, ҳомий тадбиркорлар, мактаб ўқитувчи ва ўқувчилари иштирок этди.

– Мактабимизда имконияти бир қадар чекланган болалар таълим олади, – дейди мактаб директори Раъно Ҳамроалиева. 

– Биз бу ерда асосан ўқувчиларимизни ҳунарга ўргатамиз. Уларнинг интилишлари, ўз қўллари билан яратаётган меҳнат маҳсулларини кўриб, инсон иродаси, матонати қанчалар чексиз эканига амин бўласиз. 

Балки, улар соғлом инсонлардек ҳаммасига бирданига эриша олишмас, лекин чидам ва сабр-тоқат билан қилган саъй-ҳаракатлари натижасида биздан ҳам кўра баланд марраларни эгаллаши мумкин.

Тадбир доирасида ўқувчилар учун концерт дастури намойиш этилди.

О. Бекмуродова, ЎзА