Наманган шаҳридаги 26-сонли Меҳрибонлик уйида Ўзбекистон мудофаасига кўмаклашувчи “Ватанпарвар” ташкилоти Наманган вилояти кенгаши томонидан Ватанимиз мустақиллигининг 30 йиллиги байрами муносабати билан ҳарбий-ватанпарварлик мусобақаси ўтказилди.

“Янги Ўзбекистонда эркин ва фаровон яшайлик!” эзгу ғоясини ўзида мужассам этган мазкур мусобақада болажонлар спортнинг техник ва амалий турлари таркибига кирувчи “ўқ отиш” бўйича беллашувларда иштирок этди.

Учта гуруҳда жами 41 нафар ўғил-қиз пневматик милтиқдан ўқ отишда иқтидори, мерганлик кўникмаларини намоён этишга интилди.

“Ватанпарвар” ташкилотининг спорт техникалари – картинг, мотоцикл пойгалари бўйича кўргазмалар ҳам ўқувчилар эътиборини тортди.

[gallery-3577]

Меҳрибонлик масканида қизғин тарзда кечган мерганлик баҳси икки тоифада бўлиб ўтди. Мусобақада қизлар ўртасидаги баҳсларнинг якуний натижаларига кўра, Моҳира Бозорбоева, Шаҳноза Жўраева ва Лариса Трошенко ғолиблар қаторидан жой олди. Ўғил болалар ўртасида эса Асадбек Усмонов, Отабек Солиев ва Дониёр Раҳимжонов зафар маррасига биринчилардан бўлиб етиб келди.

Болажонларга олам-олам шодлик улашган, спортнинг техник ва амалий турларига қизиқиш уйғота олган мусобақада ғолиблар ҳамда барча тарбияланувчиларга турнир ташкилотчиларининг домлом ва эсдалик совғалари тақдим этилди.

Бу каби мусобақалар, хайрли ишлар “Ватанпарвар” ташкилоти томонидан таълим масканлари, маҳаллаларда ҳам давом эттирилмоқда.

Оқилхон Дадабоев, Ҳотам Мамадалиев (сурат), ЎзА