Сўнгги йилларда футзал спорт тури ҳам ёшлар ўртасида жадаллик билан ривожланиб боряпти. Пойтахтимизда жойлашган 22-сонли Меҳрибонлик уйи болалари ҳам мунтазам равишда ушбу спорт тури билан шуғулланиб, бир қатор ютуқларга эришиб улгурди. Бир неча бор Меҳрибонлик уйи болалари ўртасида жаҳон чемпионатларида ғолиб ва совриндор бўлган тарбияланувчилар бу гал Чехиядан муваффақият билан қайтди.

Улар Чехия Республикасининг таклифи билан жорий йилнинг 18-20 октябрь кунлари Нимбург шаҳрида 16 та давлат Меҳрибонлик уйлари тарбияланувчилари ўртасида бўлиб ўтган Халқаро 1-Чехия футзал чемпионатида фахрли 2-ўринни қўлга киритди. Словения, Украина, Хорватия, Чехия, Латвия, Словакия жамоаларини гуруҳ ва финалгача бўлган босқичларда мағлубиятга учратди. Мусобақа ғолиблиги учун якунда кучли рақиб ҳисобланган Польша жамоасига қарши майдонга тушиб, фахрли 2-ўринни қўлга киритди.

Финалда рақиблар билан тенгма-тенг ўйин кўрсатган ёш футболчиларимиз Тошкент халқаро аэропортида Миллий гвардия қўмондонлиги, ҳарбий оркестр, 22-сонли Меҳрибонлик уйи мутасаддилари, тарбиячи ва устозлари, дўстлари томонидан муносиб кутиб олинди.

Ушбу тарбияланувчилар орасидан келгусида профессионал спортчилар ҳам етишиб чиқса, ажаб эмас. Мазкур халқаро мусобақалар эса уларга катта футбол сари қадам қўйишларида тажриба мактаби бўлиб хизмат қилади.

<iframe width="650" height="420" src="https://www.youtube.com/embed/E68re1ATmnM" title="Mehribonlik uyi bolalari Chexiyadan muvaffaqiyat bilan qaytdi" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

Нигора Раҳмонова, ЎзА мухбири