Mamlakatimizda bo‘lib o‘tayotgan O‘zbekiston Respublikasi Prezidenti saylovida bu safar har qachongidan ham ko‘proq kuzatuvchilar ishtirok etmoqda. Turkiya Respublikasi Anqara inqiroz va siyosatni o‘rganish markazi – “AnkaSAM” direktori Mehmet Seyfetdin Erol ulardan biri.

Xorijlik mehmonning O‘zbekiston, mamlakatimizdagi saylov jarayonlari xususidagi fikrlari bilan qiziqdik.

– O‘zbekistondagi Prezident saylovida kuzatuvchi bo‘lib ishtirok etish men uchun katta sharafdir, – dedi Mehmet Seyfetdin Erol. – Biz kun davomida bir qator saylov uchastkalarida bo‘ldik. Odamlarning faolligi, saylovda o‘zi munosib, deb topgan nomzod uchun erta tongdanoq kelayotganiga guvoh bo‘ldim.

Saylov jarayoniga oid barcha ishlar yuksak saviyada, shaffof, haqqoniy, ochiq va oshkora tarzda bo‘lib o‘tmoqda. Bu yerda odamlarga salbiy ta’sir ko‘rsatadigan biror jihatga ko‘zim tushmadi. Saylov bilan bog‘liq barcha jarayonlar xalqaro talablarga to‘liq javob beradi.

O‘zA