Фармацевтика маҳсулотлари хавфсизлиги маркази делегацияси фармацевтика соҳасидаги жаҳон миқёсидаги энг муҳим тадбирлардан бири – Сингапурда бўлиб ўтаётган, жамоат саломатлигини уйғунлаштириш йўлида ICHнинг 35 йиллик фаолиятига бағишланган тантанали маросимда иштирок этмоқда. Бу ҳақда Марказ матбуот хизмати хабар бермоқда.

Ташриф доирасида Марказ вакиллари ICHнинг стратегик ривожланиши, ICH ва PIC/S ўртасидаги ҳамкорлик, шунингдек, глобал миқёсдаги регулятор органлар ўртасида ўзаро ҳамкорлик масалаларига бағишланган сессияларда қатнашмоқда.

Ўзбекистон Республикаси Президентининг 2025 йил 19 августдаги тегишли фармони ижросини таъминлаш, дори воситаларини миллий тартибга солиш тизимини мустаҳкамлаш ва экспертлар салоҳиятини халқаро талаблар даражасида ошириш мақсадида Марказ директори Алишер Темиров раҳбарлигида ICHнинг асосий қўлланмалари – E8(R1), E6(R3), E17, E5(R1) ва M13(A) бўйича фундаментал компетенцияларини шакллантиришга қаратилган ўқув дастури учун молиялаштиришни жалб этиш ташаббуси илгари сурилди.

Ушбу қўлланмалар замонавий клиник амалиёт (GCP) бўйича халқаро стандартларни, кўп ҳудудли клиник тадқиқотларни ўтказиш ва баҳолаш тартибларини, хорижий клиник маълумотлардан фойдаланиш талабларини, шунингдек, биоэквивалентлик тадқиқотлари учун регулятор мезонларни белгилайди. Дастур миллий мутахассисларни глобал регулятор талабларига мувофиқ тайёрлаш ва илмий асосланган, очиқ ҳамда уйғунлаштирилган экспертиза жараёнларига ўтишни қўллаб-қувватлашга қаратилган.

Ассамблея доирасида Марказ директори ушбу ўқув дастурини Тошкентда ўтказиш учун Фармацевтика маҳсулотларига қўйиладиган техник талабларни уйғунлаштириш бўйича Халқаро Кенгаш (ICH) томонидан 40 000 АҚШ доллари миқдорда молиялаштиришни жалб этишга муваффақ бўлди. Тренинг халқаро экспертлар иштирокида ташкил этилиб, клиник тадқиқотлар ва регулятор фаолият соҳасида иш олиб бораётган маҳаллий ва хорижий мутахассислар учун мўлжалланган бўлиб, энг яхши халқаро тажрибаларни ўрганиш ва иштирокчилар малакасини оширишга хизмат қилади.

Шунингдек, MedDRA тиббий терминология классификаторини ўзбек тилига таржима қилиш лойиҳаси бўйича амалга оширилаётган ишлар ҳам алоҳида кўриб чиқилди. Ушбу лойиҳа учун 2025 йил май ойида Мадрид шаҳрида бўлиб ўтган ICH Ассамблеясида 150 000 АҚШ доллари ажратилган эди. Сингапурда лойиҳанинг кейинги босқичлари ва уни ўз вақтида амалга ошириш бўйича чора-тадбирлар муҳокама қилинди.

Моҳигул Қосимова, ЎзА