Нигерияда Маймун чечагидан 2022 йил ҳисобида биринчи ўлим ҳолати қайд этилди, деб ёзмоқда дунё оммавий ахборот воситалари.

ABC News агентлиги Нигериянинг касалликларни назорат қилиш ва олдини олиш бўйича агентлиги берган маълумотга таяниб ёзишича, вафот этган беморнинг аввалдан соғлиғида муаммо бўлган экан, шунингдек, у иммунитетни сунъий равишда қийнаб қўядиган дори қабул қилиб юрган.

«40 ёшли бемор вафот этди, унинг аввал соғлиғида муаммоси бўлган ва иммунодепрессантлар қабул қилиб юрган», — дейилади касалликларни назорат қилиш марказидагилар тарқатган хабарда.

Нигерияда маймун чечаги 2017 йил сентябрда пайдо бўлган эди. 2017 йилдан 2022 йилгача мамлакатда 247 киши маймун чечаги билан хасталангани қайд этилган. Ушбу касалликдан ўлим даражаси 3,6 фоизни ташкил этган.

Экспертларнинг фикрича, касалликнинг кутилмаганда бир нечта мамлакатда пайдо бўлгани вирус тарқалаётганига  эътибор берилмаганини билдиради. ЖССТнинг фикрича, маймун чечагининг тарқалиш жараёни  дунё бўйича секин кечаётганига қарамай, вазият ёмонлашб кетиши эҳтимоли сақланиб қолмоқда.