Ommaviy emlash, profilaktik tekshiruvlar hamda “Mahallabay” tizimi orqali sayyor qabullar natijasida Yangiyer shahrida mavsumiy kasalliklar soni sezilarli darajada kamaydi.

Bu jarayonda shahar Sanitariya-epidemiologik osoyishtalik va jamoat salomatligi bo‘limi hamda tibbiyot xodimlarining munosib hissasi alohida e’tirof etiladi.

– Qizamiq 40 tadan 9 taga, virusli gepatit “A” 75 tadan 9 taga tushdi, virusli gepatit “B” 2024–2025 yillarda uchramadi. O‘ta xavfli yuqumli kasalliklar — vabo, o‘lat, quturish va QKGI holatlari ham umuman qayd etilmadi, – deydi shahar Sanitariya-epidemiologik osoyishtalik va jamoat salomatligi bo‘limi boshlig‘i Botirqul Donayev. – Eng asosiysi, barcha profilaktika tadbirlari va ommaviy emlash ishlari muntazam olib borildi.

Mutaxassislar ta’kidlaganidek, Yangiyerda kuzatilgan ijobiy natijalarning asosiy sababi avvalo bolalar va aholi o‘rtasida emlash qamrovining yuqori darajada tashkil etilgani bilan bog‘liq. Buning natijasida mavsumiy kasalliklar aniq darajada kamayib, salomatlik ko‘rsatkichlari sezilarli darajada yaxshilandi.

Qizamiq kasalligi qariyb to‘rt barobarga kamayib, 40 tadan 9 ta holatga tushdi. Virusli gepatit “A” ham 75 ta holatdan 9 taga tushib, aholi salomatligiga ta’sirini sezilarli darajada kamaytirdi. Ayniqsa muhim jihati shundaki, 2024–2025 yillar davomida virusli gepatit “B” umuman qayd etilmadi, bu esa profilaktika tadbirlari va emlash ishlarining samaradorligini yaqqol ko‘rsatadi.

Bolalar emlash qamrovi ham yuqori darajada ta’minlangan. Qizamiqqa qarshi emlash orqali 97 foiz bola himoyalangan, bo‘g‘ma va ko‘kyo‘talga qarshi — 96,7 foiz, pnevmokokk infeksiyasiga qarshi — 96,5 foiz bola emlandi. Shuningdek, 9 yoshli qizlar o‘rtasida VPCH vaksinasi bilan qamrov 95,8 foizni tashkil etdi. 2025 yilda tug‘ilgan 1 023 nafar chaqaloqning 99,2 foizi esa sil va gepatit “B”ga qarshi emlanib, ularning sog‘lom o‘sishi va immunitetini ta’minladi.

Shu tariqa, emlash nafaqat alohida bolani himoya qilish, balki butun jamoa salomatligini saqlashda muhim vosita ekanligi yana bir bor tasdiqlandi. Ommaviy immunitet orqali kasalliklar tarqalishi chuqur darajada cheklanib, aholi salomatligi tobora yaxshilanmoqda.

Shu bilan birga, sanitariya-epidemiologik nazoratning kuchaytirilishi, aholi orasida tushuntirish ishlarining samarali olib borilishi va “Mahallabay” tizimi asosida tashkil etilgan sayyor qabullar emlash samaradorligini yanada oshirmoqda. Bu jarayon orqali fuqarolarning savol va shubhalari joyida bartaraf etilib, tibbiy xizmatlarga bo‘lgan ishonch mustahkamlanayapti.

Yangiyer tajribasi shuni ko‘rsatadiki, emlash nafaqat har bir bola va kattani, balki butun aholini himoya qiluvchi eng samarali profilaktika vositasidir.

G‘ulom Primov, O‘zA