Япония пойтахти Токио шаҳри жорий йилнинг 15–26 ноябрь кунлари ўтказиладиган XXV ёзги Сурдлимпия ўйинларига ҳозирлик кўрмоқда.

Дунёнинг 70 га яқин давлатидан 3 минг нафардан зиёд матонатли спортчилар қатнашадиган ўйинлар дастуридан 21 та спорт тури ўрин олган бўлиб, Ўзбекистон спортчилари футбол, таэквондо, дзюдо, эркин ва юнон-рум кураши ва стол тенниси мусобақаларида ватанимиз шарафини ҳимоя қилишади.

Куни кеча мазкур спорт ўйинларида иштирок этадиган Ўзбекистон спорт делегациясининг илк таркиби Токиога йўл олди.

Бугун, 14 ноябрь куни XXV ёзги Сурдлимпия ўйинларининг футбол мусобақаларига старт берилади.

Айтиш лозим, футбол мусобақаларида 14 та жамоа 4 та гуруҳга бўлинган ҳолда ғолиблик учун кураш олиб бориши белгиланган.

Мусобақага ташланган қуръа натижаларига кўра, футбол бўйича Ўзбекистон сурдлимпия жамоаси “С” гуруҳида Франция ва Бразилия жамоалари билан жой олган.

Бугун иродали футболчиларимиз Франция жамоаси билан XXV ёзги Сурдлимпия ўйинларидаги илк ўйинини ўтказади.

Ўйинларнинг тантанали очилиш маросими эртага бўлиб ўтади.

Т.Рўзиев, ЎзА