Аёл – Яратганнинг нозик хилқати, бир томондан назокат тимсоли бўлса, иккинчи томондан жамиятга энг таъсирли қудрат. Оиладаги муҳит, фарзандлар тарбияси оиладаги аёлга боғлиқ.

Аёл бир зумда қушдек чақнаса, бирпасда англаб бўлмайдиган тушкунлик қуршовида қолади. Аёлнинг мардлигию, матонати баъзан эса эркакларнида қойил қолдирадиган шижоати бор.

Қаҳрамонимиз Наргиза Қулматова ҳам ана шундай матонатли, ҳаёт синовларида тобланган, шижоат эгасидир.

У 2016 йилда Тошкентга кўчиб келиб, 2020 йилдан буён чиқинди йиғиш шохобчасида меҳнат қилмоқда. 

У ўз ишидан уялмайди, аксинча, ҳалол меҳнати билан уйининг ярим кредитини тўлаганидан, келин олиб, тўйлар қилганидан фахрланади. Наргиза опа фарзандларига ҳалол меҳнат қилаётганини ва бунинг савоби катталигини тушунтирган.

–Осон ишнинг ўзи йўқ, лекин бу ишим менга ёқади, – деди Н.Қулматова. – Мен ва менга ўхшаганларга “мусорчи” эмас, “тозаловчи” деб мурожаат қилишларини хоҳлар эдим. Сабаби, касбим юзасидан кўп камситишларга учраганман. Катта ўғлим мактабда ўқиб юрган пайтларда "сени онанг мусорчи", деб камситишганда йиғлаб ёнимга келган кунлари ҳам бўлган. Шунда ўғлимга айтганман. "Болам гапирса гапирар улар, бу ҳалол меҳнат, бунинг савоби катта", деб тушунтирганман. Ҳозир болаларим ҳам ор қилишмайди, ёнимда туриб биргаликда улар ҳам шу меҳнатни қилишади.  

Қаҳрамонимиз Тошкент вилояти Бўка туманида туғилган. 2016 йилда давлатимиз томонидан имтиёзли кредит асосида уй берилгандан сўнг у Тошкент шаҳрига келиб фаолиятини бошлаган.  

Гулноза Бобоева, ЎзА