Америкалик тадбиркор Илон Маскнинг маълум қилишича, Россия Украинадаги Starlink йўлдош интернет тизимини “ўлдиришга” ҳаракат қилмоқда. Унинг ҳимояси учун анча ресусрлар сарфланганига қарамай, бир кун келиб у ишламай қолиши мумкин.

“Ҳозирда Starlink – уруш жабҳасида ишлаётган ягона алоқа тизими бўлиб турибди, қолганлари ўлган. Россия Starlinkни ўлдиришга фаол равишда уринмоқда. Уни ҳимоя қилиш учун SpaceX  компанияси катта ресурсларни жалб қилган, лекин шунга қарамай, Starlink ишлашдан тўхташи мумкин", - деб ёзди Маск ижтимоий тармоқдаги саҳифасида.

Маск жума куни SpaceX компанияси Украинада Starlink хизмати харажатларига энди маблағ сарфлай олмаслигини маълум қилганди. Аввалроқ Америка оммавий ахборот воситалари SpaceX компаниясининг Пентагондан харажатларни ўз зиммасига олишини сўрагани ҳақида ёзганди. Бугунги кунда Украинага 20 минг атрофида Starlink терминали берилган. Жума куни Маск ижтимоий тармоқда ушбу амалиёт SpaceX учун 80 миллион долларга тушганини, йил охиригача харажатлар 100 миллион доллардан ошиб кетишини ёзган эди.

Пентагоннинг маълум қилишича, вазирлик Маск компанияси билан  Starlink йўлдош интернети бўйича музокара олиб бормоқда. Пентагон Украинада маҳаллий ҳарбийлар космик алоқа воситаларига эга бўлишда давом этиши муҳимлигини таъкидлаган.

Starlink – янги авлод йўлдош алоқа тармоғи ҳисобланади. У дунёни кенг полосали интернет алоқаси билан таъминлашга мўлжалланган. Маскнинг SpaceX компанияси ҳозиргача орбитага 2,3 мингдан кўпроқ Starlink йўлдошини олиб чиққан.

Украина рақамли трансформациялар вазири Михаил Федоров 26 февраль куни Маскдан Украинани Starlink  станциялари билан таъминлашни ва йўлдош интернетга улашини илтимос қилган эди. Эртаси кун Маск Starlink энди Украина ҳудудида ҳам ишлаётганини маълум қилганди.