Ироқ Вакиллар палатаси раиси Маҳмуд Машаҳдоний Туркияга ташриф буюрди, деб хабар бермоқда “Анадолу” ахборот агентлиги. Уни Туркия президенти Режеп Тоййиб Эрдоған қабул қилган.

Машаҳдоний Ироқ ва Туркия ўртасидаги алоқаларнинг мустаҳкамланиши кераклиги хусусида тўхталиб, “Тараққиёт йўли - стратегик лойиҳа, бунда иқтисодий ҳамкорлик муҳим ҳисобланади. Лекин хавфсизлик соҳасидаги ҳамкорлик жуда долзарб бўлиб қолмоқда. Биз бутун Яқин Шарқ тинчлик, тараққиёт ва барқарорлик минтақаси бўлишини истаймиз”, деди матбуот анжуманида. 

Унинг таъкидлашича, ислом ўлкалари ўртасида бирлик бўлса, Ғазо ва Эронга ҳужумлар бўлмайди. Ғазо секторида рўй бераётган турли зиддиятларга қарши ҳеч нарса қила олмаслигини тилга олган Машаҳдоний “Айрим кучларнинг бизга ҳужум қилишига сабаб бўлган нарса бирдамлик йўқлигидир”, деган. 

Сиёсатчининг фикрича, ислом мамлакатлари бир-бири билан ўзаро муносабатларини қайта кўриб чиқиши керак ва бу йўлда Туркия етакчилик қилиши мумкин. Маҳмуд Машаҳдоний Туркия билан муносабатлари ҳар доим яхши бўлганини эслатиб, Ироқ ва Туркиянинг қўшни эканлигини, бир динга эътиқод қилишини, манфаати муштарак эканини таъкидлаган. 

Унинг айтишича, Исроил ва Эрон ўртасидаги ўт очиш тўхтатилгани “вақтинчалик танаффус” холос. Агар бирдамлик бўлмаса, бундай ҳолатлар яна такрорланишига ишора қилган. Шунингдек, Машаҳдоний сафар давомидаги учрашувларда Ироқ ва Туркия ўртасидаги дўстона муносабатларни янада чуқурлаштиришни таклиф қилган. 

<iframe width="650" height="420" src="https://www.youtube.com/embed/I4sa11oXE2w" title="Mashahdoniy: Biz birlashishimiz kerak" frameborder="0" allow="accelerometer; autoplay; clipboard-write; encrypted-media; gyroscope; picture-in-picture; web-share" referrerpolicy="strict-origin-when-cross-origin" allowfullscreen></iframe>

К.Бекжонов, ЎзА