Машҳур рэпер Канье Уэст президентликка номзод сифатида рўйхатдан ўтди
Канье Уэст Оклахома штати сайлов комиссиясидан АҚШ президентлиги сайловида иштирок этиш учун мустақил номзод сифатида рўйхатдан ўтди.
Америкалик рэпер Канье Уэст Оклахома штати сайлов комиссиясидан АҚШ президентлиги сайловида иштирок этиш учун мустақил номзод сифатида рўйхатдан ўтди, дейилади комиссиянинг твиттерда тарқатган хабарида.
Хабарда айтилишича, 15 июль мустақил номзодлар томонидан ариза ташлашнинг охирги куни ҳисобланади.
Президентлик курсиси учун курашга қўшилиш нияти борлиги ҳақида Уэст июль ойи бошида маълум қилган эди. У мустақил номзод бўлишини таъкидлаган эди, чунки республикачилардан амалдаги президент Дональд Трамп ўз номзодини қўйган. Бироқ куни кеча Нью-Йоркда чиқадиган Intelligencer журнали мусиқачи ўзининг президент бўлиш ниятидан қайтгани ҳақда хабар тарқатганди.
АҚШда президент этиб сайланишга ҳақиқий имконият анъанага кўра, фақат икки етакчи партия –демократлар ва республикачилардан кўрсатилган номзодларда мавжуд. Уларнинг номи маълум, бири Дональд Трамп, иккинчиси Жо Байден. Лекин АҚШда учинчи партиядан ёки партиясиз номзодларнинг ҳам кўп овоз олган пайтлари бўлган. Шундайларнинг охиргиси тадбиркор Росс Перо бўлди. У 1992 йилда президентликка номзодини қўйиб, 19 фоиз овоз олган. Бироқ бирорта штатда ҳам ғолиб бўлолмаган ва шу боис сайловчиларнинг овозини ололмаган.